Den e weekend venidero, e federacion di ciclismo, seccion BMX lo tin e careda mas grandi di 2016 unda nan lo tene e campeonato nacional di bike cross, e dianan 3 y 4 di December riba e pista di bike cross di Streetwise na San Nicolas. Den prome instante esaki mester a bay Jaburibari pero debi na daño un bes mas causa pa e awasero na e pista di Jaburibari a cambia esaki pa Streetwise.
Riba e diasabra lo tin un entrenamento habri di 3or – 6or di atardi, mientras riba diadomingo lo tin e competencia mes cu lo inicia for di 10or di mainta te cu 5or di atardi. Mester bisa cu lo por competi den varios categoria manera Strider 2 – 4 aña, Open class 11 – 14 aña, Pro Open 15+, Girls 10, Girls 11 – 15, Girls 16+, Boys 5 – 6, Boys 7 – 8, Boys 9 – 10, Boys 11 – 12, Boys 13 – 14, Boys 15 – 16 y Boys 17+. Den e ultimo añanan nos atletanan di BMX a competi den varios evento grandi den exterior logrando resultadonan positivo pa e deporte y pa Aruba.
Nos coredonan elite como tambe esunnan mas hoben por wordo considera como esunnan miho den nos continente y cu por competi contra e mihonan di mundo. Un di e eventonan sigur cu a acapara e atencion den 2016 ta e competencia pa e mas chikitonan esta Strider caminda hopi mayor a dicidi di cumpra un bicicleta pa nan yiu(nan).
Un danki sigur na Lotto, e Loteria di Aruba pa medio di Comision di Subsidio cu a yuda subsidia e campeonato nacional di BMX na Streetwise na San Nicolas.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.