Diadomingo awor 7 di Mei lo bay tin e Sprint Triathlon Nacional na Boca Catalina. E sprint triathlon aki ta premira di bira uno super interesante den tur categoria. Varios atleta ta den e miho condicion di nan bida mientras e bataya lo bay ta uno fuerte. E top atleta Renze Postma ta bek na Aruba y a caba di logra un puesto halto den un competencia internacional di taya. No tin duda cu Postma lo bay ta un di e faboritonan pa triunfa den e evento aki. E grupo di Sandra Postma, Lucien Dirksz, Linda Smit, Bincho Mansur y e hoben Giannon Eights no por keda afo mirando e resultado obteni na Merca.
Diadomingo e evento lo cuminsa pa 7:00 di mainta na e luga di semper esta Boca Catalina. Lo bay tin dos categoria cu ta Super Sprint for Kids: Swim 375 m – Bike 10 km – Run 2.5 km, Junior & Adulto Male y Female: Swim 750 m – Bike 20 km – Run 5 km. Por competi individual como tambe den relay. Mester bisa cu Triathlon dia pa dia ta birando un deporte hopi practica na Aruba. Mayoria atleta cu ta core na pia y core bicicleta a cuminsa purba e reto di hinca landamento den nan programa y participa na eventonan di triathlon. E aña deportivo 2016 a bay sigur satisfactorio pa e federacion cu dos premio maximo den e galardon Premio Excelencia den Deporte, esaki den e categoria infantil femenino y Atleta di Aña Local pa di tres biaha consecutivo. Algun dia atras atletanan di triathlon a haci un tremendo presentacion na Key Biscane, Florida logrando numeroso medaya mientras cu e atleta elite Renze Postma a sa di logra e di 8 luga den e Camtri Triathlon na Ecuador cu un record personal nobo. Esaki sigur sin duda ta bisa hopi caba di e desaroyo y rumbo positivo cu e deporte aki ta hibando.
Un danki sigur na Lotto, e Loteria di Aruba pa medio di Comision di Subsidio cu a subsidia e evento di Aruba Triathlon Association cu ta e Sprint Triathlon Nacional.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.