Despues di 2 dia di competencia e pre-final respectivamente dia 5 y 9 di maart 2018 pa e muchanan bao di 12 aña ( te cu 11 aña) y un dia di competencia pre-final 8 di maart 2018 pa e muchanan 12 aña bai ariba, nos a yega na e dia di e gran final pa ambos categoria dia 12 di maart 2018.
E duracion di e weganan tabata mas of menos 4 ora cu ta 7 rond total pa cada dia.
Pa e categoria bao di 12 aña (te cu 11 aña) a sali siguiente ganadornan:
1e luga: Nzingha Duinkerk di Graf van Zinzendorf
2e luga: Beny Chen di S.P. Kudawecha
3e luga: Nailah Croes di S.P. Kudawecha
Pa e categoria 12 aña bay ariba nos tin e siguiente ganadornan:
1e luga: Jofiel Hernandez di Graf van Zinzendorf
2e luga: Patrick Williams di Abraham de Veer School
3e luga: Kyon Arends di Cacique Macuarima School
E ganadornan absoluto (1e luga) a ricibi un bicicleta como premio mayor, cortesia di Arowak Damclub.
E finalistanan di e 2e y 3e luga den ambos categoria a ricibi como premio un set di dam cortesia di Arowak damclub.
Coordinador Mildred Wever y IBiSA ta gradici e bond di dam y club di dam Arowak pa nan tremendo aporte y cooperacion, prome, durante y despues di e competencia di dam escolar. Tambe Sra. Wever ta gradici su coleganan di IBiSA cu a yud’e cu e competencia aki.
E ta gradici tur e maestronan y mayornan cu a coopera y permiti pa laga e muchanan aki participa y tambe cu a hiba, busca y algun cu a keda warda e muchanan na e luga di competencia.
Y sin laga afo un danki special ta bay na tur e muchanan cu a participa y competi. Na tur cu a haci nan maximo esfuerso pa haci e competencia aki grandi.
Den un periodo corto (den menos di 1 luna di tempo), a logra di registra un total di 95 participante pa e competencia di dam escolar 2017-2018, cual ta 56 bao di 12 aña ( te cu 11 aña) y 39 di 12 aña bay ariba.
Si cada school cuminsa prepara a premira cu pa e aña escolar 2018-2019 e competencia di dam escolar ta bay bira mas grandi. Y pa esaki lo nos lo prepara un localidad mas grandi.