Diadomingo 25 December 2016 ‘Pasco di Nacemento’ , dialuna 26 December 2016 ‘di dos dia di Pasco di Nacemento’ y diadomingo 1 Januari 2017 ‘Aña Nobo’ ta considera como dianan oficial di fiesta of conmemoracion segun art. 22 di e Ordenansa Laboral 2013.
Compensacion pa traha riba un dia di fiesta of conmemoracion
Pa sectornan horeca, casino y continuo un dia di fiesta of conmemoracion por ta un dia normal di trabou. Den caso cu e trahado ta geschedule pa traha riba e dia aki e tin derecho riba 200% di su salario. Si ariba e dia aki e trahado traha mas cu su oranan regular (pa sector horeca/casino esaki ta 9 ora y pa sector continuo ta 8 ora) ley ta considera cu e trahado ta traha overtime ariba un dia di fiesta y e tin derecho riba 250% pa e oranan extra.
Pa sectornan cu por aplica trabou di shift (ploegenarbeid) segun e lista oficial anuncia door di Director DAO entrante 1 Januari 2014 (p.e. kiosconan, touroperators, sector di limpiesa, recreacion, huurmento di auto y atraccionnan turistico) ta posibel pa schedule un trahado pa traha riba 6 di e 11 dianan di fiesta. Riba e sobra 5 dianan di fiesta e trahado mester ta liber. Riba e 6 dianan e trahado cu ta riba schedule tin derecho riba 200% di su salario y si no por duna e trahado liber riba e otro 5 dianan y ta yame pa traha overtime e tin derecho riba 250% pa e oranan regular (8 ora) y pa e oranan extra.
Pa e otro sectornan (p.e. supermercado y comercio en general) caminda e dianan di fiesta ta considera como un dia di sosiego, den caso cu pidi e trahado pa traha riba e dia aki, esaki lo ta a base di overtime y e trahado tin derecho riba 250% di su salario.
DAO ta pidi tur dunado di trabou y trahado pa tene bon cuenta cu e compensacion pa traha riba un dia di fiesta pa e diferente sectornan.