Diahuebs 11 di Mei, Centrale Post ta manda strandpolitie pa un panoord di Hard Rock Cafe, cerca di e zebrapad unda cu segun e persona cu a yama, lo tin construccionnan andando sin e permiso necesario. Na e sitio e agentenan policial ta papia cu e Manager di South Beach Mall, e cabayero S., y el a declara na polisnan cu diahuebs mainta el a riapra cu tin trabaonan di construccion tumando luga y cu na prome instante el a pensa cu ta Elmar of un otro compania lo ta haciendo trabaonan rutinario na e sitio ey, door di kita santo, cerca di e acera. Ora cu el a bay papia cu e trahadonan, el a bin haya sa cu ta trata di trabaonan pa un proyecto di “Friendly Green Bikes”. E compania aki ta bezig ta pone varios fietsstal pa bicicletanan den cercania di hotelnan. S. a bisa cu e trabaonan di coba ta demasiado cerca di e zebrapad y caminda publico. Segun S. e trahadonan no tabata tin permiso. E agentenan policial a acerca e señora F, representante di “Friendly Green Bikes” y el a mustra e permiso cual a wordo otorga door di DIP. E señora F a duna polisnan un copia di e permiso pa pone materialnan di construccion riba caminda publico. Polisnan a conseha e señor pa pasa Warda di Polis pa hiba e papelnan original pa asina esakinan por wordo verifica. En bista cu nan tabata tin un permiso di DIP, nan por a sigui cu e trabaonan. Pa mas o menos 11 or e señora F. ta bin Warda di Polis cu e papelnan original y el a wordo informa cu e por sigui cu e trabaonan di construccion.