Algun dia pasa Gobierno di Aruba a presenta e presupuesto 2017 pa asina esaki por wordo discuti den Parlamento.
Den e informacion entrega pa Gobierno no tin un nota di cambio pa loke ta referi e presupuesto asigna na Husticia. Gobierno di Aruba a compromete cu nos comunidad dia 13 di October na aumenta e suma dirigi na Ministerio di Husticia cu 10 miyon. Pa awor, nos mester a mira caba un nota di cambio anunciando e incremento aki pa combati criminalidad, pero nada di esaki ainda.
Comision ProSiguridad por a scucha den diferente media, cu ATA kier aporta otro aña na Ministerio di Husticia (no sin antes scucha un plan detaya di e minister encarga) un suma di 5 miyon. Mirando e dificil situacion cu nos turismo ta aden cu un caida di 20.5% den e luna di September y cu tur indicador den nos turismo bahando; nos Comision ta convenci cu no ta momento pa ATA haci “donacion” na otro ministerio, pero pa nan concentra ariba nan mesun asuntonan y bin cu solucion pa e problema serio cu nos industria maximo ta enfrentando y cu probablemente lo ta coriendo den cora otro aña, segun e proyeccionan di e mesun ATA.
Na lugar di debilita e cash flow di ATA y teniendo den consideracion e caida drastico cu nos turismo ta experimentando, nos ta haya cu ATA mester concentra tur su esfuerso y fondonan den e mihoramento di nos pilar maximo. Pa e motibo aki, Comision ProSiguridad ta considera cu e 10 miyon pa husticia mester bin di RECORTE di Gobierno.
Pero nos Gobierno lo sa kico recorte ta? Den e presupuesto 2017 nan ta añadi esakinan entre otro:
Rietveld Academie: 6 miyon
TNO: 2 miyon
Tram: 1.2 miyon
Pueblo ta kere cu esakinan ta prioridadnan pa nos mirando con e criminalidad ta scala?
Gobierno ta tribi di asigna un presupuesto na postnan cu no tin prioridad aworaki y no ta tene na cuenta cu e peticion di pueblo di e 10 miyon pa Husticia, como cu no tin nota di cambio a drenta ainda?
Atrobe nos ta mira cu SIGURIDAD no ta un PRIORIDAD pa e gobierno aki y nos ta exigi seriedad di nan banda, Husticia ta mas importante cu TNO, un academia di arte y e tram cu ta kibrando comercio den Caya Betico Croes.
Dia 27 di October nos Comision ta warda un contesta serio y un plan inmediato cu ta cubri tur e puntonan di nos manifiesto.