Diamars Minister Otmar Oduber conhuntamente cu su staff di Ministerio di Infrastructura y Medio Ambiente a sinta cu e personanan cu lo wordo apunta pa forma parti di e comision Flora y Fauna.
Por medio di ley di naturalesa, e Naatuurbeschermingsverordening, e Minister encarga cu proteccion di medio ambiente y naturalesa, tin e habilidad y tambe deber pa instala un comision pa asina por dune conseho relaciona cu diferente tema cu tin di haber cu nos naturalesa. En conexion cu esaki, a sa di acerca diferente personanan cu tin posicion clave den comunidad, cada un cu nan experticio sumamente importante, pa cuminsa e proceso pa instala y sigui cu e trabounan di comision flora y fauna.
Di parti di Minsterio por informa cu e idea aki ta uno sumamente importante pa por a sinta cu diferente personanan y asina intercambia e diferente perspectivanan, preocupacionnan y ideanan tocante nos Medio ambiente y e maneho di esaki. E aspecto di crea un balansa ta wordo mira como algo hopi importante y tambe pa por compronde y por inclui e perspectivanan di comunidad y perspectiva di parti di Gobierno. Ta sumamente contento di por conta cu aporte di diferente expertonan den e comision di flora y fauna. Pa locual ta e miembronan, por meciona e nombernan cual ta: sra. Dilma Arends, sra. Anastacia Brete, sra. Mirsha Winterdaal, sra. Hillegonda Rodriguez – Taekema y sra. Damilice Mansur. Manera menciona e comision aki tin diferente experticio den e area maritimo pero tambe di nos matanan local, nos leynan y e experiencia di ta opera den practica pa locual cu ta nos medio ambiente.
Aworaki Aruba ta na e momento unda cu e aspecto di medio ambiente y desaroyo balansa ta wordo mira como uno sumamente importante y ta mira cu e trabou y e conseho cu e comsion por duna ta uno sumamente balioso y necesario. Ta desea tur miembro di e comison aki hopi exito y conhuntamente lo traha riba un desaroyo balansa y tambe e bienestar di nos medio ambiente.