Laurentien van Oranje a funda De Missing Chapter Foundation (MCF) na 2010; e fundacion tin como obhetivo contribui na solucion cu bista riba futuro pa asunto cu ta toca henter sociedad. MCF ta encurasha esunnan cu ta stipula maneho pa tuma na cuenta e perspectiva di mucha y adolescente. Pa logra esaki MCF ta inicia y facilita e proceso di dialogo y compromiso entre mucha, adolescente y esunnan cu ta stipula maneho.
De Missing Chapter Foundation a desaroya e programa Kids Council na Hulanda en colaboracion cu UNICEF, programa cu a introduci na Corsou y awor na Aruba.
AHATA a bira un di e pioneronan di Kids Council na Aruba na october 2015 hunto cu La Cabana Beach Resort and Casino, Renaissance Aruba Resort & Casino, Divi and Tamarijn Aruba All Inclusive Resort, Aruba Tourism Authority y Amsterdam Manor.
Pa e aña escolar 2016–2017, AHATA a cuminsa traha riba un proyecto nobo cu alumnonan di Scol Primario Kudawecha Klas 6-C. E pregunta dificil presenta na e alumnonan tabata “Con AHATA su Comision di Medio Ambiente por aumenta conscientisacion pa e importancia di reduci cantidad di consumo diario di productonan y saconan di plastic” sabiendo cu e ley di saco di plastic ta drenta na vigor na Januari 2017.
Como prome fase di e programa, dia 12 di November, e comision di medio ambiente di AHATA a ofrece un presentacion na e alumnonan di Klas 6C. Tur alumno tabata hopi entusiasma y cu yen gana pa siña mas over di e topico, pa asina nan por compronde mas riba dje y traha riba nan investigacion cual lo bira e di dos fase unda cu nan lo duna AHATA conseho y posibel solucionnan.
AHATA ta gradici Scol Primario Kudawecha, su alumnonan y docente Rene pa a ricibi nan cu curason habri. Ta un inmenso placer traha cu mucha di scol y siña di nan, alabes cu ta duna nan oportunidad di participa den asunto importante, caminda ta tende di nan y nan por expresa nan punto di bista.
Na September 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba door di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.