Delincuencia y vandalismo a crece recientemente den a area di Caya Grandi, pa cual e comerciantenan den Caya Grandi a pidi mas patruya y mas proteccion policial. Sra. Lindy Croes ta amplia mas ariba esaki.
Comerciantenan a tene un reunion urgente cu minister di Husticia, ya cu vandalismo ta aumentando e ultimo simannan, y a pone tanto Minister Presidente como minister di Husticia na altura di esaki, pa asina por yega na un areglo pa cu Caya Grandi. E comerciantenan a pidi pa tin mas siguridad, mas proteccion policial den centro di ciudad.
Sra. Croes ta haci un peticion pa cuminsa traha riba un posibel solucion y apoyo pa cu comerciantenan ya cu nan ta haya cu falta patruyahe y proteccion. Asina e bishitantenan tambe lo por sintinan mas safe y lo por yega parkeer su auto y bay shopping den un forma sigur y den tur trankilidad.
E problema di adictonan ambulante cada biaha ta birando mas preocupante, pa cual Sra. Lindy Croes a señala cu nan lo reuni cu e fundacion pa asina cuminsa cu e programa pa adictonan un biaha mas. E problema di adiccion no ta bon ni pa nan mes, ni pa comerciantenan.
Comerciantenan lo reuni cu gobierno pa purba yega na un areglo unda cu tur lo mester bin hunto, pa yega un solucion pa asina trece mehoracion y mas movecion den Caya Grandi.