Ankara, TURKIA- Mehmet Öztürk, doño di un tienda, a entrega keho den Corte na Turkia. Motibo pa esaki? “Como ciudadano Turco mi ta sumamente indigna cu e atakenan di Hulanda, specialmente contra di nos minister di asuntonan di famia, Fatma Betül Sayan Kaya, su guardespaldanan y su conseheronan”, segun Öztürk.
Segun Öztürk gobierno Hulandes a purba di humiya e gobierno Turco cu su trato inhumano. E detencion di Ministernan Turco tambe ta un violacion di e Tratado Europeo pa Derechonan Humano.
E comerciante, proviniente di e ciudad Kahta den e sur-este di Turkia no solamente a entrega keho contra di Willem- Alexander, pero tambe contra di tur autoridad cu den su bista ta responsabel pa e trato humiyante di e ministernan Turco. Asina el a declara na e oficina di prensa estatal Turco, Anadolu.
Ademas di Willem- Alexander, e ta entrega keho tambe contra di Prome Minister Mark Rutte, minister Ronald Plasterk (Asuntonan Interior), minister Bert Koenders (Relacionnan Exterior) y alcalde di Rotterdam, Ahmed Aboutaleb.