Pa Sr. Raul Wever cu ta doño di e negoshi di cuminda cu ta keda riba e crusada di Mahuma a mustra cu e no ta contra desaroyonan pa cu e proyecto Green Corridor pero si mester tene cuenta cu tin negoshi riba e caminda aki pa cual awor e lo bay mas atras mirando cu e ta cera full rond dor di e proyecto aki.
Ora cu e otro banda di rotonde tabata cera, e tabata 11 luna cu nan a sufri, pa motibo cu mayoria di clientenan tabata bin di richting Sta. Cruz, Papilon y e benta a baha como 50%. Y actualmente el a bay te na 80 pa 90%. Practicamente niun cliente ta yegando e negoshi di Sr. Wever. E ta algo comprendibel ya cu ta full un omweg mester haci pa yega eynan.
Segun Sr. Wever, e prome biaha cu nan acerca Minister, y e esunnan encarga cu DOW y UNDINSA. Tur a priminti di traha riba e situacion pa un caminda pa clientenan yega cerca nan, pa facilita e problema cu nan tin. Tambe nan lo a haya stoel cu mesa, pero nada di esey no a wordo cumpli.
Lo warda e proximo simannan, pa wak con por yega na un solucion, reuni cu un di instancianan concerni, pa wak con lo por yud’e, si ta Minister of DOW. Sino lo mester wak kico nan lo por haci y cual ta e siguiente stapnan cu lo por tuma, ya cu e ta un situacion hopi fastioso.
Unico manera cu clientenan por yega na Sr. Wever su negoshi ta via Dump, of via patras di Airport, via e junkyard Petfet, dus pasa patras di Airport, ta yega patras di Joanne. Esey ta un omweg completo, ya cu e caminda di santo tampoco no ta nada safe.
Como comerciante Sr. Wever ta pidi pa wordo tuma den consideracion den e caso aki, pa varios aspecto cu ta pasando cu proyecto di Green Corridor. Como un negociante nobo, dus young entrepeneurs y un comerciante netamente Arubiano y ta haci un yamada na tur instancia cu por duna un man, ya cu nan ta un negoshi cu ta duna un bon servicio, bon prijs y bon calidad.
Esey no por kita cu pavia di e Green Corridor, lo mester cera e negoshi. Esaki lo ta e ultimo paso cu nan lo kier tuma. Pa loke ta e siguiente fase di e proyecto aki, e instancianan a duna Sr. Wever mas o menos 3 luna pa e proyecto por keda cla. Y asina e cliente por yega back cerca nan mas pronto posibel.