BOGOTA, Colombia – Despues di e debut di e seleccion Colombia den e Mundial di Rusia 2018, riba rednan social por a mira un grupo chikito di fanaticonan Colombiano cu a burla di e siguridad den stadion di Saransk pa drenta cu alcohol den verrekijker. Entre nan tabata tin Luis Felipe Gomez, cu tabata funcionario di Avianca y cu a wordo kita for di trabao despues di esaki.
E aerolínea a publica un comunicado unda cu e ta señala cu e persona tabata funcionario di e compania. El a agrega tambe cu e lo wordo retira di su cargo door di su conducta cu a bay viral ariba rednan social.
“Avianca Holdings ta rechasa tur tipo di actuacion cu ta bay contra di nos principio y balornan como compania. Por lo tanto nos a tuma e decision di termina e contract di trabao di e empleado di empleado di Avianca Carga presente den Mundial kende su comportacion a viola e ley y normanan vigente den cuadro di e evento mundialista”, e comunicado di e aerolinea a sigui bisa.
Canciyeria Colombiano a manifesta tambe su rechaso na e conducat di e Colombianonan den e stadion di Saransk, cu a pesar di e medidanan di siguridad di prohibi benta di alcohol den stadionnan deportivo, solamnete cerbes, nan a uza strategianan pa no cumpli cu e norma.
“Nos ta haci un invitacion na nos paisanonan cu ta bisti cu e camiseta tricolor y cu ta representa miles di Colombiano na e Mundial di Rusia pa fomenta respet y bon comportacion; nan no ta representa nos cultura, nos idioma y nos raza”, e canciyer a bisa.
E Colombianonan, protagonista di e video cu a bay viral, lo por perde e siguiente partidonan di Mundial si nan wordo nenga entrada na e stadionnan, un medida cu ta wordo studia pa autoridadnan Colombiano cu a wordo manda pa Rusia.
Fuente: NTN24