BOGOTA, Colombia – Tres homber homosexual a converti den e prome famia poliamoroso den wordo reconoci legalmente na Colombia, unda cu e matrimonio entre personanan di e mesun sexo ta legal desde 2016.
“Nos ta pretende di valida nos hogar, nos famia, nos Constitucion y nos derechonan, pasobra nos no tabata tin nada solido legal cu tabata constitui nos den famia,” Victor Hugo Prada, un di e miembronan di e union aki a bisa den un video di e Sistema Informativo di e Universidad di Antiquia (noordwest) divulga dialuna via medionan local.
E actor y su parehanan a constitui diasabra, dia 3 di Juni un regimen patrimonial conoci legalmente como “trieja” den un notaria di Medellin, e di dos ciudad di e pais.
“Nos ta constitui den famia, un famia poliamoroso. Ta prome biaha na Colombia cu ta haci esaki,” el a agrega.
E matrimonio ta conforma ademas pa e educador fisico, John Alejandro Rodriguez y e periodista Manuel Jose Bermudez, kendenan na 2000 a celebra e prome boda gay publico na Colombia.
E tres hombernan a consolida como trieja na final di 2012, ora cu den un teatro di Medellin, Victor Hugo a pidinan pa nan casa. Desde e tempo ey nan ta comparti nan tempo, placa, espacio y nan sexualidad, nan a splica.
Aunke den e pais surAmericano tin mas caso di e tipo di unionnan asina, esaki ta e prome “cu a legalisa”, German Rincon Perfetti, abogado y activista LGBTI, a splica.
“Hopi hende ta biba den trieja, pero den closet,” el a afirma.
Segun Rincon, accede na e regimen patrimonial aki, tin su implicacionnan “shen porciento legal” pa e tres hombernan, manera cu den caso di separacion of fayecimento di uno di nan, nan tin cu haci separacion di bienes of acceso na pensioen.
“Esaki ta un reconocimento cu ta existi otro tipo di famia,” e abogado a apunta, kende a afirma cu e reconocimento legal aki a ampara den e liber desaroyo di personalidad y autonomia di suhetonan estableci den e constitucion Colombiano y den tratadonan internacional.
Na Colombia ta existi matrimonio di personanan di e mesun sexo y parehanan homosexual tin e derecho di adopta menor, sea of no yiunan biologico di uno di e miembronan, pa decision di Corte Constitucional.
Fuente: http://www.eluniverso.com