Departamento di Impuesto ta participa cu e cobransa di grondbelasting di aña 2017 a sali.
E cobransa tin fecha di 31 di mei 2017 y den e dianan venidero e clientenan lo ricibi esaki via post.
E ley vigente ta duna un cliente e option pa por paga su grondbelasting den un solo biaha of den termino. Departamento di Impuesto ta conseha tur cliente pa lesa e texto imprimi riba e cobransa cu hopi atencion pa cu e terminonan di pago.
No a ricibi cobransa?
Pa dia 31 di mei 2017 tur cliente mester a ricibi nan cobransa. Si esaki no a sosode, mester acudi mas pronto posibel na oficina principal y pidi un duplicado. E persona cu ta pidi e duplicado mester identifica su mes sea cu cedula, paspoort of rijbewijs valido.
Termino di pago
Aki ta sigui un skema di e terminonan di pago manera stipula pa ley:
Grondbelasting 2017 fecha 31 di mei 2017
Termino di pago Fecha final pa haci pago Suma di pago rekeri segun ley
E prome 2 terminonan 30 di juni 2017 50% di e suma di cobransa pa cubri prome y di dos kwartaal
Di tres termino di pago 30 di september 2017 25% di e suma di cobransa pa cubri e di tres kwartaal
(juli – sept).
Di cuater termino 31 di december 2017 25% di e suma di cobransa pa
(ultimo termino) cubri ultimo kwartaal (oktober – (december)
Pa dia 31 di december 2017 e cobransa di aña 2017 mester ta completamente paga.
Haci pago
Por haci pago na Departamento di Impuesto mes, na un oficina di gobierno den districto of via banco. Pa e clientenan cu ta paga via banco, ta sumamente importante pa ora di haci e pago pa nan menciona e number di referencia yama ‘Gegevens-ID’, cu ta aparece riba e cobransa. Pa e descripcion ta completo, ta bon pa pone acerca cu ta trata di ‘Grondbelasting 2017’ y menciona e persoonsnummer cu ta aparece riba e cobransa. Di e forma aki Departamento di Impuesto por procesa e pagonan corectamente.
Areglo di pago
E cliente cu no por paga su cobransa di acuerdo cu e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu Departamento di Impuesto ta continua cu e proceso di cobramento cu gradualmente por bira mas severo, locual por nifica tambe gasto extra pa e cliente. Pa e areglo di pago mester pasa na seccion Servicio pa cliente na Camacuri of haci un cita cu un funcionario encarga cu cobramento.