Comite Olimpico Peruano y e Organizacion Deportiva Panamericana (ODEPA)a organisa na Lima, Peru, un Forum continental pa representantenan femenino di e mundo Olimpico. E evento a conta cu e orador di renombre internacional, Gabriella Müller-Mendoza, cu por cierto aña pasa a presenta un conferencia similar na Aruba. E biaha aki e continente a reuni na Lima, caminda durante e foro di 3 dia, e participante nan a bay door di entrenamento intensivo y training combina cu discusionnan y sesionnan di guia cu ayudo di un team di entrenadornan profesional. Entrenadornan masculino y femenino den e region como tambe atletanan Olimpico a tuma parti pa contribui y apoya na e intercambio di diferencia entre dirigentenan masculino y femenino den e mundo di deporte.
COA a participa cu dos representante na e Forum, den persona di Amanda Maduro y Julisa Jones. Nan ta conta cu e participantenan na e foro aki a trece diferente otro perspectiva di con nan ta logrando pa eleva deporte y hende muher den deporte y den posicionnan di liderasgo. Loke mas a acapara e atencion ta cu mayoria di e hende muhernan no ta wordo apoya financieramente pa nan gobierno y cu nan tur tin un pasado den e mundo impresarial. Mayoria ta traha cu nan Comite Olimpico Nacional y ta crea un “netwerk” hopi bon y usa nan conexion pa patrocinionan duradero. Loke pora ripara tambe cu a pone hopi enfasis riba e programanan di “Grassroots” caminda ta hinca hopi tempo y finansas den educa entrenadornan pa entrena muchanan chikito den scolnan basico y organisa competencia escolar y purba “scout” e mihonan pa bira miembro di clubnan organisa mara na un federacion deportivo. Esaki ta e forma pa desaroya atletanan hoben cu talento pa haci deporte na nivel halto y crea asina despues di algun tempo atletanan elite
Mester bisa cu Amanda y Julisa a siña hopi cu lo por wordo incorpora den nos sistema deportivo na Aruba ya cu e keda demostra cu esaki traha na otro islanan chikito den nos region anto cu poco recurso financiero. A conoce tambe un poco di e cultura y baile di e pais di Peru cual semper ta keda uno impresionante.