Despues di 32 aña cu Club Kibrahacha 60+ a habri su portanan, awe e ta uno exitoso pa nos grandinan, segun director, Jeffrey Matos. E ta sigui splica cu nan a wordo funda na 1985 pa Aruba Rotary Club. Awe, despues di 32 aña nan ta un fundacion hopi exitoso caminda cu nan ta brinda servicio na e grupo di 60+ cu ta bin for di tur districto di Aruba pa nan centro di actividad, unda cu ta ofrece diferente tipo di actividad, Matos a enfatisa.
Como fundacion, ultimo añanan, a haci hopi cambio den nan organisacion, tanto riba nan actividadnan, pero tambe den e staff. Actualmente tin un staff hopi hoben y dinamico, cu ta cla y cu tin hopi interes pa duna e servicio, mescos cu el a wordo duna durante e ultimo 32 añanan na nos comunidad di 60+. Hunto cu e voluntarionan, Matos ta convenci, como e director di e organisacion, nan lo haci un hopi bon trabao den e añanan nos dilanti, sigur mirando cu exigencia cu nos 60+moderno awendia ta pidi hopi mas cu ta solamente cosnan basico. Pesey nan tambe lo dirigi nan mes riba e necesidadnan di nan.
Matos a splica cu nan ta haciendo algun investigacion. Un studiante di Hulanda a bin Aruba pa yuda e organisacion cu esey, caminda cu nan lo sinta hunto cu stakeholdernan cu ta traha riba e tereno di e grupo di 60+, caminda cu nan por compila informacion y formula maneho nobo pa e siguiente añanan nos dilanti cu e grupo en berdad ta creciendo hopi rapido. Naturalmente mester por adapta e programa y actividadnan na e necesidadnan di e grupo di 60+ na Aruba.
Amplificacion di orario tambe ta den plan, como tambe nan actividadnan despues di merdia y sigur pafo di e centro tambe. Nan tin un centro grandi y tin hopi posibilidad y experiencia y nan tin un grupo grandi di voluntario cu ta yuda. Esey ta loke ta e exito di e organisacion pa e ultimo añanan, cu nan ta mantene e prijs pagabel pa e grupo di 60+. No solamente kico nan por haci sino tambe con nan ta den e comunidad di Aruba. Como fundacion, tin sosten grandi di comercio y tambe naturalmente di e miembronan tambe, cu ta contribui cu nan. Pero tambe sigur Aruba Rotary Club, y tambe Gobierno. Como fundacion financieramente ta depende di diferente ayudo, recursonan, cu ta yuda pa awe nan ta existi y cu nan lo sigui traha pa e comunidad, Matos a comenta.