Diahuebs tabata un momento historico pa FAVI y Aruba. E reto grandi tabata pa Gabriel Maduro y Casiene Tromp cu ta ciego, pa forma parti di e examen escolar di trafico. FAVI ta di opinion cu ta hopi importante pa e muchanan cu limitacion di bista tambe sinti nan mes sigur den trafico y participa na dje mescos cu tur otro mucha.
E preparacion a cuminsa aña pasa na augustus. Na unda cu Meredith Faarup y Nina Fernández e dos maestranan Ambulante di FAVI, a cuminsa sondea e posibilidadnan y puntonan cardinal di trafico cu ta importante pa nan sa.
Maestranan a cuminsa busca conseho di Hulanda y brainstorm e posibilidadnan hunto cu scolnan, Comision di trafico, Inspeccion di Enseñansa, Examenbureau y Minister Rudy Lampe. Na final a logra compila un version adapta di e examen y produci den Braille.
E examen a consisti di 3 parti:
1. Nos reglanan di trafico
2. E teoria di e uzo di e garoti blanco strepi cora
3. Uzo corecto di e garoti den practica.
Un elogio grandi ta bay pa scol Colegio Santa Theresita y Sint Annaschool cu desde e prome dia cu a ricibi Gabriel y Casiene na scol, nunca a limita nan, mas bien semper a traha hunto cu FAVI pa saca e maximo potencial di nos muchanan. FAVI kier gradici Jovelle Castro y Analisa Leest, e assistentenan personal di e Gabriel y Casiene cu ta guia nan diariamente den klas. Tambe FAVI kier duna pabien na nos otro 2 clientenan cu bista limita, Nina Lacle di scol Maria Goretti y Xizion Josephia di Colegio Sagrado Curason cu tambe a forma parti na examen di trafico escolar.