Wel, wel, no sa kiko ta pasando den politika riba Boneiru, pero kosnan ta bai den estilo di divishon mas ku e union ku tabata boga pe na vispero di e ultimo elekshonnan. Awenos ta sinta ku partido Demokrat tambe ofisialmente a split di otro, ora ku Clark Abraham ofisialmente den un karta a informa e presidente di partido Demokrat i konseho di e partido, el a tuma un posishon independiente den Raad.
Den un karta dirigí na direktiva i konseho di Partido Demokrátiko Boneriano na atenshon di e presidente Jessy Crestian, Clark Abraham ta informá di su posishon tumá. Segun e karta, manera konosí pa Presidente, pa mas ku un aña tin un estorbo den e relashon profeshonal di vários miembro prominente di nos organisashon polítiko i nos lider polítiko i frakshon señor Robby Beukenboom. Den vários forma a hasi intento pa yega na resolvé esaki. Na mas okashon kolega Pieters a ekspresá asta por eskrito sierto preokupashon pa loke ta funshonamentu di Frakshon di Demokrat i su lider di Frakshon, ku e deseo pa nan wòrdu atendé pa nos direktiva i/òf den konseho di partido. Lástima ta ku kolega Pieters te awe no a risibí un kontesta ni reakshon klaro riba kontenido di su kartanan.
Na sierto momento lider di frakshon, señor Beukenboom a indiká na kolega Pieters ku si e tin problema ku su liderato den Frakshon, e ta proponé pa señor Pieters bira lider di Frakshon. Señor Pieters riba su turno a indiká di ta dispuesto di akseptá e proposishon aki bou di kondishon ku esaki tin sosten di nos partido i ta sugerí un reunion general pa sondeo sosten pa e proposishon aki serka nos miembresia. Señor Beukenboom ta nenga esaki sin mas. E situashon a kontinuá i eskala di tal forma ku kolega Pieters ta skohe pa tene honor na su mes i ta tuma retiro di Konseho Insular debí ku e no por funshoná optimalmente komo representante di pueblo den e forma i esfera krea pa señor Beukenboom.
Ku retiro di kolega Pieters, mi persona komo kabesante di lista a risibí invitashon pa drenta den Konseho Insular. Siendo ku e responsabilidat elektoral di elekshon último riba mi lomba i e nesesidatnan grandi vigente den nos komunidat, sin mas mi a skohe pa tuma enkargo di e responsabilidat. Ta hopi tabata e pregunta i preokupashonnan de vários hende ku ta aserka mi persona, ta kon ta bai traha huntu den frakshon si e esfera i forma di operá di señor Beukenboom keda meskos. Semper mi kontesta tabata ku nos lo inisiá ku bista pa dilanti i na un manera profeshonal lo intentá di pone kos funshoná.
Pa mi sorpresa i disgustu, riba dia 9 di mei na mi promé reunion bek den Konseho Insular, señor Beukenboom ta skohe di usa su tempu di disertashon pa deskredita i inisiá un atake frontal riba su propio kolega di frakshon saliente i nos kolega miembro di partido señor Michael Pieters. Un kolega ku apesar di diferensia di opinion i desakuerdo riba liña di pensamentu, a skohe di mantené honor na su mes i entrega su asiento bek na e partido di kual e ta miembro. Un akto ku den e realidat i akontesimentu polítiko di nos isla ta algu di respetá. Ta un forma hopi baho pa ataka bo propio kolega ku ya no ta miembro mas di Konseho Insular i por sierto no por defendé su mes.
Mesun anochi den sala, mi a aserka señora presidente ku tabata presente pa mi huramentashon, ku e petishon pa nos por topa i papia riba kon tin ku sigui awor. Señora presidente a indiká di tin ku bai eksterior i dia señora presidente regresá, nos por topa pa deliberá i palabra kon pa sigui. Mientras tantu un reunion di frakshon a wòrdu konvoká pa e siguiente dia, den kual reunion mi persona entre otro a kuestioná señor Beukenboom riba aktitut desrespetuoso i alabes e forma denigrante ku e ta trata i ekspresá su mes (públikamente) pa ku demas kolega i mi persona. Na lugá di akseptá òf pidi diskulpa pa su akto bergonsoso, ku a wòrdu transmití riba radio i ta hasta graba, sr. Beukenboom ta desmentí esaki.
Mi a informá señor Beukenboom ku mi persona den e forma aki no tin konfiansa den su liderato di nos frakshon i ku mi lo sondia kon mihó kontinuá. Mi intenshon pa ku e periodo aki tabata pa warda riba regreso di presidente pa asina huntu wak kon nos por resolvé e situashon reinante. Pa mi sorpresa, riba djabièrnè último señor Robby Beukenboom ta skohe pa bai radio i presentá un kantidat di mentira i akusashonnan sin base riba kolega Pieters i mi persona. Señor Beukenboom a hasta skohe di bai asina leu di insinuá ku señor Pieters i mi persona a negoshá tras di su lomba i di nos direktiva pa forma gobièrnu. Un gran mentira, pasombra manera presidente mes a konfirmá mas ku un biaha den nos reunion di direktiva den presensia di señor Beukenboom, ku mi persona a informá señora presidente mesora ku siendo di bishita na Statia, nos a topa i kombersá ku nos kolega sra. Coffie.
Es mas, ta mi mes persona a pidi un kompatriota presente pa saka un potrèt di nos huntu, ku na mes momentu mi a manda pa nos presidente. E forma denigrante i e nivel ku señor Beukenboom ta skohe di bai, esta entre otro, krea i ekspresá mentira i trata na difamá kolega i kompañeronan di frakshon i di partido públikamente i den media a baha na un nivel rèkort.
Fin di siman ku a pasa, mi a sondeo mi konsenshi i buska konseho serka esnan ku ta mas serka di mi. Pa mas kuantu mi kier buska resolushon den nos frakshon. Lastimá ku e aktitut, forma di proseder i nivel di sr. Robby Beukenboom mi no ta mira espasio pa ni ku intermediashon nos yega na un resolushon pa por traha i koperá ku otro. Un relashon, sea personal òf profeshonal, ta basa riba rèspèt i konfiansa mutuo i esakinan no ta presente. Pa ta klaro, despues di tur e labatiba di e último dos aña nan aki, mi no a resta ni un krenchi di konfiansa mas den señor Robby Beukenboom.
Mi a drenta Konseho Insular pa representá mi Pueblo i su interes. Teniendo na kuenta tur e tópikonan di atenshon i retonan inmenso ku ta asotá nos isla, mi no por permití pa pèrdè tempu pa atendé ku aktitut infantil i disputa interno kontinuo ku no ta sirbi nos pueblo ku nada. Pa mi por ehersé mi responsabilidat ku e pueblo aki a pone riba mi skouder i pa representá pueblo su interes na un manera digno, no ta resta mi niun otro opshon ku tuma un posishon independiente den Konseho Insular di Boneiru. Tumando nota di e responsabilidat públiko di e funshon ku nos ta ehersé komo miembro di Konseho Insular i e deber ku nos tin di informá nos miembro i votadornan, e karta na direktiva i konseho di partido aki lo ser poné na disposishon di medionan di prensa i públiko general.
Te asina leu e karta di Clark Abraham na direktiva i konseho di partido Demokrat, di kual kopia a yega prensa tambe. Nos lo keda pendiente di kualkier desaroyo den e notisia aki.
Fuente: http://www.boneiruawe.com