Sr. Marlon Pieters cu conseho pa e ultimo fin di siman di carnaval, caminda cu e ambiente ya ta cuminsa for di diahuebs. E weekend cu ta bin ta bay ta uno bastante pisa pa Bureau City Inspector.
Lo mester bay tene cuenta cu e cantidad di sushi cu ta bay laga atras ariba e rutanan, dos di San Nicolas y tambe di Oranjestad. Sr. Pieters un biaha mas ta haci un apelacion na e publico, pa si no tin saco di plastic, bin cun’e for di cas y tambe e cahanan di cerbes cu ta bashi, etc. pone esakinan banda di caminda, unda Serlimar por haci su trabao mas efectivo.
Por a ripara cu ta keda enfoca ariba e cuestion di sushi cu ta wordo laga atras, pa cual Sr. Pieters ta splica cu hopi di sushi ta end up den lama, plastic, foambox, etc, yen di e material cu por bula bay facilmente. Tambe tur tipo di boter di cerbes, y tambe un bleki yen cu dal hende cun’e, ta forma un peliger.
Sr. Pieters a sigui splica cu e peliger t’ey den e boter, door cu esaki por kibra, unda un di e mironesnan por corta nan pia. Cierto di e puntonan, segun Sr. Pieters, manera e crusada Adriaan Lacle Blv, Chaos Cafe, den Vondellaan tambe tin cierto luganan cu probablemente lo keda sushi. Pero un biaha mas, City Inspector, Sr. Pieters ta haci un apelacion pa e pueblo demostra, pa e ruta completo por keda hopi limpi den e caso aki.
Pa loke ta trata San Nicolas, ta mescos, caminda lo tin dos evento tras di otro y ta p’esey Sr. Pieters ta pidi por demostra cu Aruba ta nos, Nos ta Carnaval, pero ban tene nos isla limpi.