Dialuna marduga a sucede un atraco brutal na un cas di un comerciante na Papaya. Tabata ora cu e doño di cas y su pareha a yega nan residencia, drentando paden 5 persona cara tapa y arma for di pafo a drenta hunto cu nan y di biaha a pone arma na nan cabes y tapa nan cara.
Paden e ruman di e doño di e cas tabata y e tambe nan a pone arma na su cabes y tapa su cara. E atracadornan a listra den e cas y a bay cu un suma di mas o menos 20 mil florin. Tambe nan a bay cu e celularnan di e personanan y e yabi auto.
E atracadornan ta papia spaño. Con e atracadornan a bandona e sitio no ta conoci ainda ya cu e victimanan nan cara tabata tapa y nan no a scucha niun auto sali bay. Ta pensa cu e atracadornan lo a para un auto den cercania y pasa door di un pida mondi y subi auto bay.
Slachtofferhulp tambe a presenta na e sitio ya cu e dama a keda hopi trauma di e forma brutal cu nan a pone un arma di candela na su cabes y un cuchiu na su garganta. Recherchenan di atraco team tambe a presenta pa hasi nan investigacion y departamento forensico tambe a bin na e sitio pa tuma vingerprint y algun evidencia. Investigacion di parti Cuerpo Policial ta sigui pa asina pronto pone man riba esnan responsabel.