TECNOLOGIA
Apple tin rond di 5 mil empleado di su compania trahando cu acceso na un proyecto relaciona cu autonan autonomo, segun un investigacion di FBI.
E dato aki ta forma parti di un denuncia den contra di un ex trahado di Apple (Xiaolang Zhang) cu ta wordo acusa di horta secretonan comercial y di propiedad intelectual di e compania tecnologico.
E demanda a wordo presenta dialuna pa un husgado federal di San Jose, California, unda Zhang a presenta den corte pa responde na e acusacionnan di FBI riba e caso aki.
Como parti di su investigacion pa sostene e demanda contra Zhang, FBI a sigura cu Apple tin mas o menos 5 mil empleado cu permiso di siguridad pa maneha informacion di un proyecto “pa desaroya software y hardware pa uza den autonan autonomo”.
Considerando cu Apple ta conta cu 135 mil trahado full time, e 3.7% di e empleadonan di Apple lo tin acceso na e proyecto aki.
E investigacion di FBI ta specifica cu rond di 2700 di e 5 mil trahadonan ta conta cu permiso adicional pa drenta den e database di e proyecto.
For di hopi aña caba ta conoci den Sillicon Valley cu Apple ta trahando riba e tereno di autonan autonomo, a pesar di cu e gigante tecnologico apenas a duna detayenan relaciona cu su plannan pa cu esaki.
Zhang, e acusado den e caso, a cuminsa traha pa Apple na december 2015.
Dia 30 di april el a anuncia cu e lo kier renuncia na su trabao, y cu e lo tin intencion di bay traha pa XMotors, un empresa Chines dedica na e investigacion di e tecnologia di autonan autonomo.
Según investigadonan, Zhang a descarga un gran cantidad di informacion di Apple algun dia prome cu el a anuncia su retiro.