Santa Cruz de Tenerife, ISLANAN CANARIA- Un ekipo internacional di astronomonan a descurbi un planeta montañoso y calido cu ta orbita un strea enano color cora y cu, pa su caracteristicanan inicial, lo por tin awa cual ta haci’e ideal pa hende por biba.
Segun un publicacion den e revista Nature, e exoplaneta, batisa como LHS 1140b, ta pafo di e sistema solar y e ta orbita rond di un strea tipo M “algo mas chikito cu nos solo y menos luminoso, pero un di esunnan cu mas ta sobresali den e galaxia”, segun e investigaod di e Instituto Astrofisica di Canarias y co- autor di e estudio, Felipe Murgas a splica.
E supermundo y su strea ta den e constelacion di Cetus (monster marino), na 39 aña lus di distancia di nos Solo, “den e vecindario di e Sistema Solar”, segun Murgas.
“E ta exoplaneta mas interesante cu mi a wak den e ultimo decadanan”, y e obhetivo perfecto pa hiba un di e misionnan mas grandi di e ciencia: busca evidencia di bida mas leu cu nos mundo”, segun e autor di principal di e estudio, Jason Dittman.
Hecho ta, cu ta e instrumentonan di MEaerth- South cu a permitinan midi e radius di e planeta y danki na e spectografo HARPS instala den e Observatorio ESO La Silla (Chile), cu a logra midi e masa di e planeta, e periodo orbital y su densidad.
Segun e midinan aki, LHS 1140b tin un radius 1.4 biaha mas cu di Planeta Tera y su masa ta 6.6 biaha mas cu di nos planeta.
Pero mas importante ta su condicionnan, particularmente favorabel pa biba y pa su cercania pa cu e strea cu e ta orbita, e ta keda den loke ta wordo yama “zona habitabel”.
E temperatura di e superficie di e luga ta permiti e existencia di awa den e tres estadonan posibel” likido, solido y fluido.
“Si tin awa of no ta depende di e composicion atmosferico di e planeta y di otro factornan, manera e presencia di camponan magnetico den e planeta”, Murgas ta enfatiza.
Sinembargo, pa tin bida manera cu nos conoce, mester tin, ademas di awa, un planeta mester retene un atmosfera. Riba e punto aki, investigadonan ta kere cu, pa su tamaño grando, mas di un miyon di aña pasa e exoplaneta lo por tabata tin un oceano di magma den su superficie, loke lo por a duna vapor na e atmosfera.
Berdad ta cu, ainda falta hopi pa averigua y pa studia di e supermundo aki, cu ta na e “limite di loke por wordo observa cu e instrumentonan actual”, pero importante ta cu e ta un planeta “potencialmente interesante” y un “hopi bon candidato” pa busca bida.