CIENCIA
Un grupo di cientifico Italiano a descubri un riu di awa likido bou di ijs di e zuidpool di Marte. Esaki lo por ta e prome prueba convincente di awa den estado likido riba e planeta cora.
Un gran masa di awa salo, cu’n diameter di mas o menos 20 km, a wordo detecta danki na datonan recopila pa e sonda Europeo Mars Express.
E riu ta situa na 1.5 km bou di ijs, den un región yama Plamun Australe, ubica na e zuidpool di Marte.
E articulo tocante e hayasgo a wordo publico pa e revista Science. E investigación a wordo presenta tambe den e sede di e Agencia Espacial Italiano, cual presidente Roberto Battiston, a describi como “lo mas importante di e ultimo añanan”.
“Nos e descubri awa riba Marte”
Cientificonan a analisa datonan recopila entre 2012 y 2015 pa e instrumento MARSIS, instala a bordo di Mars Express. E calculonan ta mustra cu e ondanan di radar a penetra den e ijs di e zuidpool, pero a refleha den un cuerpo di awa cu tabata tin bou di dje. Mester bisa cu e perfil pinta pa e radar ta hopi parecido na e riunan grandi di awa likido haya bou di Antartida y Groenlandia.
“Nos a descubri awa riba Marte”, Roberto Orosei, científico di e Instituto Nacional di Astrofisica di Italia y un di e autornan di e estudio a sigura. Cualkier otro splicacion pa e reflehonan briyante detecta pa cientificonan den nan observacionnan di radar ta “insostenibel”, el a agrega.
Aunke cu e profundidad di e lago no por a wordo determina, probablemente cu e deposito tin al menos un meter di densidad pa produci e refleho.
Cientificonan awo lo busca pa determina si e descubrimento aki ta unico of si tin mas riu den otro partinan di e planeta. Nan ta calcula cu “no tin niun motivo pa conclui cu e presencia di awa subteraneo riba Marte ta limita na un solo ubicacion”.
SCIENCE