GOLFO DI MEXICO – Cientificonan a descubri un “lago” den e Golfo di Mexico. Tur hende, cu drenta e pool aki den fondo di lama, lo sufri horiblemente.
Erik Cordes, profesor asociado di Biologia na Temple University, a investiga e pool y a describi su hayasgonan den e revista Oceanography.
“E ta un di e cosnan mas maraviyoso den fondo di lama. Bo ta bay abao den fondo di e oceano y bo ta mira na un lago of un riu cu ta core. E ta sinti mescos cu bo no ta parti di e mundo aki,” Cordes a conta Seeker.
E awa den e “lago dentro di e lama” ta mas of menos cinco biaha mas salo cu e awa rond di dje. Tambe e ta contene concentracionnan altamente toxico di metano y hidrogeno sulfido y pues no por mescla cu e lama rond.
Pa animal (y hende) cu ta landa den dje, e concentracionnan toxico por ta mortal. Solamente bida bacterial, tube worms y cabaron por biba den e circumstancianan aki.
Pa cientificonan, e lago aki ta manera un speelplaats pa nan investigacion. Nan por explora con cierto organismo por sobrebibi den habitatnan extremo.
“Tin hopi hende cu ta tira bista na e habitatnan extremo aki riba tera como modelo pa loke nos por descubri si nos bay na otro planeta,” Cordes a conta Seeker.
Fuente: http://www.sciencealert.com/