Sra. Christina Lampe ta mama di tres yiu y antes e tabata forma un carera na television, na Tele Aruba. Pa 25 aña largo el a traha como presentadora di noticia, periodista, directora di noticia y directora di nos planta nacional di television, Tele Aruba.
Su formacion e tempo ey el a haya na Media Center na Hulanda y a core stage na NOS, Fara Omroep Stichting y University of the West na Jamaica. Despues di su salida for di Tele Aruba, el a subi un caminda diferente, cual ta e caminda di spiritualidad, siguiendo un estudio di teologia, cu su enfoke ariba transformacion di nacionnan.
Pa Sra. Lampe, ta un gran honor pa ta forma parti di partido CURPA. El a realisa su trabao na Tele Aruba cu hopi amor, pasion y dedicacion. Y cu e mesun amor, pasion y dedicacion aki e kier haci’e como politico, sirbiendo e pueblo di Aruba como un politico.
Segun Sra. Lampe, e ta convenci cu CURPA lo ta e partido cu lo salba Aruba y el a drenta politica pa motibo cu e ta profundamente preocupa pa loke ta pasando na Aruba. E ta preocupa pa e pueblo y pa su yiunann, y tambe pa e hubentud.
Kico ta pasando realmente na Aruba, sra. Lampe ta puntra. Tin mal maneho den gobernaicon, cu a hinca nos pais den un debe astronomico, monstruoso, corupcion di nivel halto. Y tolerancia pa cu esaki. Duda grandi a ser crea pa tur e motibonan aki, den nos sistema hudicial. Falta di moralidad, decencia y integridad. Y mucho tolerancia pa maldad. Si e decadencia aki cu Aruba ta pasando aden al momento, no bira bek, temponan trabahoso ta spera nos.
Otro preocupacion cu e tin tambe ta pa su yiunan. Ta cual ta e modelo, e ehempel, cu nos yiunan lo construi nos futuro. E model y ehempelnan di awe? Sra. Lampe no ta kere y e ta sigur cu e pueblo tampoco ta di acuerdo.
Ta pa es motibo aki cu CURPA ta participa na e eleccion di 22 di September proximo pa nan haci e cambio necesario. E tereno cu Sra. Lampe a scoge ta COmunicacion, Media y Asuntonan Social. E ultimo aki ta pa motibo cu e ta acapara tur e esferanan cu tin pa haci un transfromacion di un comunidad. Media cu ta esun cu mester salbaguardia e pueblo, poniendo e berdad y nada mas cu e berdad ariba mesa. Awor por mira cu e berdad no ta sali. E pueblo tin derecho ariba e berdad. Pasobra un pueblo cu ta ricibi e berdad ta un pueblo liber. Ta un pueblo cu un spirito halto, ta un pueblo no por wordo manipula.
Y e ultimo parti ta comunicacion.
Tur esaki lo bin despues den e plan di maneho di e partido CURPA. Sra. Christina Lampe a sigura cu partido CURPA ta e solucion y e ta pidi pueblo e sosten pa CURPA y pa pueblo sostene su persona pa asina e y su partido CURPA por forma parti di e proximo gobernacion pa asina haci e cambionan pa asina Aruba bira caminda cu e mester ta y pa nunca mas e bolbe unda cu e ta awe. CURPA ta convenci cu Aruba ta un pueblo culto y dinamico cu no ta tuma engaño mas, pasobra e pueblo na cuminsamento a haya un encanto. El a haya un encanto y awor el a desencanta y e ta den un desilusion. Sra. Christina Lampe por ultimo a priminti cu e pueblo lo no biba den desilusion y cu e momento a yega pa salba e pueblo di mannan corupto, mannan cu solamente tin saco na pecho y no ta preocupa pa loke e pueblo ta pasa aden.