Di un banda e ta un alivio pa mira cu como cu nos ta den aña di eleccion, Gobierno ta dunando deporte na Aruba poco mas atencion. Nos por mira cu deporte en general ta probechando di e atencion aki pa asina por yega na loke ta nan necesidadnan cu tanto nan a sclama pa nan, pa asina tanto tempo.
No por nenga cu tin algun organisacion deportivo cu si a logra prospera den e ultimo añanan, pero mayoria a keda den olvido despues di poco tempo.
Un di e problemanan cu e organisacionnan deportivo ta keda confronta constantemente, ta e falta di subsidio pa por organisa eventonan cu lo por lanta interes den nos hobennan pa haci algun tipo di deporte.
Otro problema cu ta biba den e organisacionnan deportivo na Aruba, ta e parti organisatorio, como tambe e promocion y marketing di nan eventonan.
Den mi opinion, tin dos punto cu mester di atencion importante pa un organisacion deportivo, y cu mi ta convenci cu nos lo por brinda nan e ayudo necesario pa cu esakinan. Y aki mi no ta papiando solamente di subsidio, cu logicamente ta e ayudo cu ta mas necesario pa nan, pero tambe traha man den man cu nan individualmente cu metanan realistico pa cumpli na corto y largo plazo.
Nos lo apunta un team special y cu personanan acredita y lo pone un persona di e team aki pa traha estrechamente cu cada organisacion deportivo, pa asina hunto yuda yega na cumpli e necesidadnan cu cada organisacion lo por tin.
Nos mester corda cu e organisacionnan deportivo existente na Aruba ta un realidad danki na boluntarionan cu ta dedica tur nan oranan liber pa amor na deporte, y den mayoria caso nan mesun placa ta loke tin nan riba pia ainda.
Nos ta consciente cu tur facilidad deportivo na Aruba mester atencion inmediato, y esey ta algo cu sigur cu nos di partido MEP lo pone como prioridad asina cu nos drenta Gobierno.
Un deporte cu lo haya atencion extra di mi persona y di partido MEP, lo ta e deporte di Drag Race cu, na banda di carnaval, ta un di e poco eventonan cu por atrae miles di publico pa bishita San Nicolas.
Por wel di ta cu pa un grupo considerabel di persona e deporte aki no lo mester keda considera como tal, pero e realidad ta cu e hobby/deporte aki ta uno cu ta hala hopi atencion y lo por trece un aporte extra na nos economia.
Mi ta convencia cu si nos duna e deporte/hobby di Drag Race mas atencion y yudansa, henter Aruba lo por beneficia di dje como cu e lo crea mas trafico di turista pa nos isla, cual semper ta un factor positivo pa nos economia, specialmente e comercio di San Nicolas.
Si nos kier mantene nos hobennan leu di mal caminda, deporte ta un di e miho opcionnan y como tal nos tin di dun’e su debido atencion. Nos mester traha den pro di tur dicsiplina deportivo cu tin na Aruba, sin importa ken ta afilia na cua organisacion, of cua entidad financiero cu lo por ta su tras. Deporte na Aruba merece atencion concreto y inmediato pasobra nos hubentud ta depende di dje.