Segun informacion cu nos ta dispone di dje, ta bisanos cu na hospital falta un cantidad di mas of menos 25 verpleegkundige.
Esaki ta nifica cu e cantidad limita di personal cu tin disponibel pa atende y cuida nos comunidad na hospital ta asina limita cu ta comun pa e personal draai shiftnan demasiado largo, poniendo asina presion riba e calidad di servicio medico y te hasta nan mesun salud.
E aña aki un bes mas e placa di presupuesto di pais Aruba destina pa hospital, lo ta significativamente menos compara cu aña pasa, strobando asina atrobe e proceso pa busca mas personal pa traha y atende cu pashent. Structuralmente e presupuesto di hospital ta keda bira menos den e ultimo añanan, causando un decadencia inmediato den e cuido medico na Aruba.
Nos por pensa cu teniendo un Minister di salubridad cu ta un dokter activo, su prioridad lo ta pa hospital brinda un servicio optimal na su pashentnan, pero lastimamente nos por realisa cu esey no ta e caso.
Nos mester compronde bida di un ser humano no por tin prijs y salud ta algo cu no por menosprecia. Mescos cu ora ta toca na un famia di nos, nos kier pa e haya e miho cuido posibel, mescos nos tin cu duna e personal di hospital cu ta duna e cuido aki na nos sernan keri, e material necesario pa nan por haci nan trabou manera mester ta.
Ta hopi facil critica sin sa e factornan cu ta hunga un rol den e proceso di cuido di un pashent, pero te ora cu nos sa e realidad di kico ta come y bebe den e ambito di enfermería na hospital, e ora nos lo por compronde e realidad.
Preguntanan cu mi tin pa Minister di Salubridad y na AZV ta:
Cuanto dokter falta y den ki ramo di specialisacion?
Cuanto verpleegkundige falta y den ki nivel (MBO/HBO)/ specialisacion?
Cuanto personal falta den departamento nan di Medische ondersteuning?
Kiko ta e motibo cu ta baha e presupuesto pa hospital cada aña?
Ideal ta pa nos por tin un rapport cu tur e informacionnan aki pa asina den termino corto y termino largo nos por sigura y hasi tur lo posibel pa e hospital cu nos tin draai optimalmente.
Ki bal tin edificionan nobo y aparatonan medico moderno, pero pero e personal mes no tin e prioridad cu mester serca Gobierno, y specialmente un Minister cu sa mihor ki e necesidadnan di nos hospital ta.
MEP no ta contra e renobacion di Aruba su hospital, pero sigur MEP ta mira inversion den personal como prioridad.