E momento a yega pa partidonan den oposicion, habri wowo y reconoce e realidad di un gobierno di AVP, cu ta goberna pa bienestar di nos pueblo, pa futuro di e interes general di e pais.
Mientras cu fraccion di MEP y otronan den oposicion ta insisti pa pinta un panorama negativo y maligno, desaroyonan den tur bario rond Aruba, ta mustra net lo contrario ya cu tur caminda pueblo por mira na kico Gobierno ta usa fondonan di pueblo.
Sin excepcion algun di un of otro bario, por papia di desaroyonan grandi y significante rond di henter e isla, caminda pueblo ta biba di cerca un desaroyo cu ningun otro gobierno a yega di logra den su historia, Parlamentario ing Chris Dammers ta splica.
“Aki nos no ta papia solamente di proyectonan cu ta den ehecucion of cu ya a keda ehecuta caba y otronan cu ainda falta, pero Gobierno di AVP ta pensa semper riba tur den nos comunidad, dunando semper un man ora cu por, pa alivia e peso financiero pa cualkier famia.
Prosperidad Comparti ta otro vision di Gabinete Mike Eman II, dirigi pa duna un man na nos hendenan, cu diferente decision positivo tuma cu a drenta na vigor for di luna di Januari di e aña aki 2017.
Nos por menciona aumento di pensioen di nos hendenan grandi cu 2.3% cu a drenta na vigor na inicio di luna di Januari 2017, cu lo brinda nos hendenan un espacio extra mientras cu tambe a tuma e decision pa aumento di salario minimo cu 2% cu mester drenta na vigor tambe pa e luna aki.
Ya caba gobierno a informa comunidad di e decision pa reduccion di tarifa di coriente residencial cu 15% cu a drenta na vigor for di prome di Januari di e aña aki y na mes momento un reduccion di 5% pa loke ta tarifa di coriente pa e sector comercial pa mesun fecha menciona.
Na inicio di e aña nobo aki, Gobierno tambe a participa cu lo introduci un aumento den pago di bijstand cu sin duda tambe ta duna un tiki mas espacio na esunnan cu ta depende di e entrada aki.
Fuera di e decisionnan positivo aki, Gobierno a dicidi di aumenta e asina yama ‘normatieve uitkering’ cu tabata anteriormente 407 florin pa e suma di 450 florin mientras cu e ‘familielid bijslag’ tambe a subi for di 175 florin te cu 200 florin.
Pa loke ta ayudo pa yuda cubri gastonan di aña escolar pa mamanan soltera cu ta bibando di onderstand, Gobierno a dicidi di subi e ‘schoolkindertoelage’ cu 50 florin caminda anteriormente e tabata stipula na 200 florin y awor e ta bira 250 florin y aki tin cu agrega cu pago di placa di scol pa un mucha, a aumenta for di 120 florin te cu 220 florin, cu ta un aumento di 100 florin.
Esaki ta e nificacion cu Gobierno ta duna na su vision di Prosperidad Comparti, caminda semper a ser menciona cu asina cu desaroyonan ta permiti cosnan positivo pa Gobierno, esaki lo wordo comparti cu pueblo di Aruba.
E desaroyonan relaciona cu apertura di e refineria na San Nicolas, sin duda tambe ta permiti e tipo di decisionnan aki y tin cu agrega na e lista di decisionnan aki, cu a dicidi di cambia e porcentahe di rebaho pa loke ta financiamento di estudio, cu tabata 30% caminda e lo bira awor di 35% y na mes momento a dicidi cu studiantenan lo tin derecho di reduccion completo di pago di studielening for di impuesto cu lo ta te un maximo di 10 mil florin.
Gobierno di AVP tambe a dicidi di introduci un cambio den e tarifa pa piki sushi di cas cu ta di 25 florin, cual lo bira awor un tarifa social di 10 florin pa cas pa esunnan cu tin un entrada bou di 2500 florin pa luna.
Ta decisionnan cu ta sigui refleha e maneho cu Gobierno di AVP a bin ta ehecutando a base di su programa di gobernacion cu pueblo a sostene na 2013 caminda e prosperidad comparti, ta esencial den e maneho aki, Parlamentario Chris Dammers a declara.