PEKING, China – E minister di Relacionnan Exterior Chines, Wang Yi, a exigi diaranson fin di e maniobranan militar di Merca y Zuid Korea, mescos cu e programa armantistico nuclear di Noord Korea, pa calma e animonan den e peninsula.
Pa e minister Chines, e pruebanan nuclear di Pyongyang ta un “violacion cla di e resolucionnan di Nacionnan Uni,” pero e maniobranan militar entorno e peninsula “tampoco ta respeta e resolucionnan” en cuestio y a pidi na e mesun momento pa para e ehercisionan castrense conhunto di e ehercito di Merca y Zuid Korea.
Wang Yi a expresa den un rueda di prensa na Berlin, den un encuentro cu su homologo Aleman, Sigmar Gabriel.
Seoul a anuncia maniobranan conhunto cu un portavion Mericano, cu tin cu yega na e region proximamente.
Washington a manda su portavion nuclear “Carl Vinson” y su flota escolta pa e peninsula Koreano, unda cu ta premita pa e yega na final di e siman.
“E peliger cu conflictonan nobo estaya den cualkier momento, ta grandi. Ta pa e rason aki nos ta pidi tur partido pa demostra sanger friu y evita cualkier acto of palabra cu por yega na provocacionnan nobo,” e hefe di e diplomacia Chines a declara.
Interoga riba e riesgonan di un conflicto arma, e minister a considera cu “incluso un 1% di riesgo no por wordo tolera,” ya cu un guerra lo bay tin consecuencianan “inimaginagel.”
Fuente: AFP