Ariba e di 6 anochi di Hanukkah, e festival di luz di e Hudiunan, miembronan local di e comunidad Hudiu a uni cu e huespednan di Hilton Aruba Caribbean Resort & Casino pa na un manera informal y hogareño cende e luznan di e khanukiyah cu a wordo traha door di e hotel. E honor pa cende e di seis bela a bai pa Rene Kan, representante di e propietario, y su dos yiu homber adolescente. Rabbi Daniel Kipper di e sinagoga Beth Israel situa na Oranjestad, a felicita e huespednan na e ocasion di e fiesta cu ta conmemora con a lanta contra opresornan Griego y e rededicacion di e Tempel na Jerusalem den e di segundo siglo A.C., mientras cu Cantor Gaston Bogomolni, di Argentina, a acompaña e ceremonia cu su guitara.
Despues di e ceremonia di iluminacion dilanti e hardin di e resort, e Cantor a reuni tur invitado den lobby pa asina continua na deleita e invitadonan cu melodianan tradicional. E entretenimento y e donuts di Hanukkah a wordo ricibi cu hopi entusiasmo y tabata un sorpresa placentero pa e invitadonan. Esaki ta di dos aña cu Cantor Gaston Bogomolni ta duna un presentacion en bibo na Hilton Aruba Caribbean Resort & Casino. Bogomolni ta un Cantor famoso cu actualmente ta residencia na Miami. Teniendo na cuenta cu e isla su herencia multicultural, Hilton Aruba Caribbean Resort & Casino ta celebra y ta reconoce e diversidad di nan distinguido huespednan y empleadonan, door di mantene un calendario cu fechanan importante..