Jair Bogaerts, Arturo Charles y Robert Geerman recientemente a haci un bishita na Minister di Salud, Cuido di nos Grandinan y Deporte dr. Alex Schwengle na su oficina unda a presenta nan plan pa crea un proyecto multifuncional pa deporte.
Minister dr. Alex Schwengle semper ta interesa den iniciativanan nobo cu por trece desaroyo y eleva e nivel di bida na Aruba, como tambe ta motiva pa mas cuidadano participa na deporte recreativo, y a keda contento cu e presentacion di e ideanan aki.
E nomber Bogaerts sigur ta di biaha pone nos comunidad pensa riba e deporte di baseball y Jair, kende ta ruman di Xander, ta un gran beisbolista tambe, pero den e caso aki e bishitantenan a bin presenta minister un proyecto cu ta hopi mas amplio cu unicamente baseball.
E centro multifuncional, segun esunnan cu a presenta e plan, ta pa acomoda diferente deporte individual y di ekipo cu ta popular na Aruba, incluyendo atletiek, futbol, volleyball, baseball y basketball.
E mandatario a keda hopi satisfecho cu e presentacion; programa y proyectonan di figuranan deportivo local semper ta bonbini cerca dje. Minister Schwengle a gradici nan pa nan bsihita y ta keda pendiente pa e desaroyonan pa cu e proyecto nobo y inovativo aki, cu su realisacion sigur lo beneficia no solamente nos muchanan y hubentud, pero e comunidad di deportista y amantenan di deporte di tur edad.