Un biaha mas Centro di Bario Playa Pabao ta organisa su tremendo actividad di paseo riba bicileta ariba Dia Di Betico. E ta un actividad cu ta wordo organisa pa mas di 10 aña caba y ta exitoso. Sr. Dennis Burkley, presidente di directiva di Centro di Bario Playa Pabao ta splica.
Actividad Familiar
E no ta un actividad solamente pa hoben of adulto, pero pa henter famia participa. Motibo ta cu hobennan por bay riba bicicleta y mayornan y muchanan chikito por bay den bus. Ta cobra solamente pa 5 florin, cu ta inclui un t-shirt, fruta y co’i bebe.
Ruta
E ruta ta cuminsa na Centro di Playa Pabao pa 9 or di mainta exacto. Djey ta sigui pa Bubali, Koyari subi caminda grandi. E prome stop lo bay ta na Arashi, di mas o menos 15 minuut unda lo parti fruta, awa y juice. Despues ta sigui pa e districto di Noord, unda e di dos stop ta na Compleho Deportivo Frans Figaroa. Ta sali di Noord, direccion Centro Playa Pabao. Ta premira cu ya pa 1 or di merdia, ya lo mester a yega Centro caba.
Exigencia pa participacion
Ta exigi pa cada bicicleta tin nan brake di man ta funciona. Sin esaki, participacion no ta posibel. Edad minimo pa participa ta 8 aña. Tin biaha mucha chikito kier participa, pero esey ta keda na discrecion di cada mayor. Lo tin un pick- up hunto cu e muchanan den paseo, pa si acaso algo bay malo cu e bicicleta, e mucha por pone su bicicleta den e baki di pick- up, subi bus y sigui participa toch.