Dia 23 di Februari 1978, ta exactamente 40 aña pasa cu Centro di Bario di Playa Pabao a wordo funda. Un centro cu e ultimo 40 aña a demostra su derecho di existencia.
Pa Sr. Dennis Burke, presidente di Centro di Bario Playa Pabao ta mas cu logico, pa na e momentonan aki recorda Sr. Watty Vos, kende a tuma e iniciativa di a forma e prome directiva y a lanta e fundacion. Sr. Burke mes a wordo eligi como comisario durante e di dos reunion di directiva. Durante e reunion Sra. Gisela Schotborg (d.f.m.) y Sr. Tolin Chirino (d.f.m.) tambe a wordo acepta pa forma parti di e directiva.
Reunion tabata tuma luga na oficina di Osticeba y tin biaha hasta te 1’ or di madruga. Danki na Sr. Edgar Boekhoudt, cabesante di Sint Franciscus College, nan por a haci uzo di un klas pa reuni y tambe pa organisa nan actividadnan. Sint Franciscus College tabata nos centro. Aki a lanta diferente comision e.o. comision: di hubentud, di damas y di deporte y comision di revista cu a percura pa e prome revista a mira lus. Cu varios comision tabata lanta manera padestoel no solamente tabata nifica e trabou duro di e directiva, pero e necesidadnan di e bario pa actividad riba tereno social, cultural, deportivo y educativo. Pues, e trabou di pionero a bay relativamente facil, danki na e habitantenan di Playa Pabao mes. Unda nan a pidi ayudo nan tabata haya.
E actividanan cu a wordo orgainsa tabata anochi di cine, seso-sport, torneo di futbol, diferente charla, paseo cu nos grandinan, celebracion di dia di mama y hopi mas.
Cu awe e centro por celebra 40 aña tambe ta danki na diferente directiva cu den ora liber a traha na bienestar di nan bario. Sr. Burke di Centro di Bario Playa Pabao no kier cuminsa menciona nomber, pasobra ei sa cu e lo lubida algun. Si e ta gradici tur miembro y ex miembro di directiva y di e diferente comisionnan pa e trabou cu nan a haci pa e centro. Trabou cu como boluntario bo no ta warda riba un danki pero cu bo ta haciele cu amor pa bo bario. Ademas, mester menciona e otro instancianan, cu a duna aporte grandi na nos centro esta Gobierno(nan), CEDE-ARUBA, ATHA, UNOCA, Lotto pa Deporte y Aruba Way Foundation. Pues, Sr. Burke ta considera e trabou cu a wordo desplega durante e ultimo 40 añanan hopi valioso pa nan bario. Tur hende cu na un of otro forma a yuda por ta orguyoso di esaki. Un biaha mas masha danki.
Y awor kico mas? Durante ultimo aña tabatin diferente cambio na e centro. A crea hopi facilidad y a organisa hopi actividad. Ta deseo di e directiva actual, pa mas habitante haci uzo di e centro. Pa bo centro bo no mester warda riba iniciativa di directiva. Abo mes por bin cu propio iniciativa y directiva lo duna e aporte y espacio pa aporta na bo bario.
Centro di Bario Playa Pabao ta falta algun comision no solamente pa facilita e tarea di directiva, sino tambe pa bin cu iniciativa nobo. Comision di hubentud, comision di deporte y comision pa duna informacion ta algun cu Sr. Burke ta desea di por lanta.
Solamente e comision di e 60+ ta actualmente activo. E comision aki ta haciendo un trabou sublime. Un danki ta bay na e hobennan di bario cu ta organisa nan plan vacacional y ta yuda na tur actividad. Tur cos ta bayendo den bon direccion y siete aña pasa a renoba y amplia e centro. Sr. Burke ta termina felicitando e bario di pabou cu e 40 añanan di logro y e lo topa boso na nos actividadnan e aña aki.
Playa Pabao pabien y ban sigui traha na bienestar di nos bario. Nos tey pa facilita bo.
Y manera himno di Centro di bario Playa Pabao ta bisa: E amor di su hendenan, nan comprension y dedicacion ta e forza di Playa Pabao. Playa Pabao te na fin di mundo.