Centro di Bario Noord (CBN) lo otorga Premio Meneer Ovito Tromp pa di 3 biaha

0
RBC Juli 2018
Funmiles-2018

E aña aki pa di tres bes, Centro di Bario Noord lo celebra nos fiesta nacional cu nos actividad Fiesta Arubiano cu cada biaha ta un exito rotundo. Riba e dia aki nos lo entrega tambe pa di tres bes un premio na un persona of grupo cu a traha boluntariamente pa e pueblo di Noord, esta Premio meneer Ovito Tromp.
Na 2016 directiva di CBN a dicidi pa introduci un premio pa duna reconocimento na baluartenan di e bario di Noord cu pa varios aña na un manera of otro a aporta grandemente na nos dushi bario. No solamente nos ta reconoce e echo cu ta importante pa duna balor na nan trabou awo cu nan ta na bida, pero tambe nos ta di opinion cu un premio asina por forma incentiva pa e generacion nobo por haya e smaak pa tambe aporta na nan bario. Mas cu claro cu na momento cu a bay duna nomber na e premio en cuestion directiva den su totalidad unanimamente a dicidi di duna honor na nos presidente meneer Ovito Tromp d.f.m. Ta un hecho cu meneer Ovito Tromp tabata un boluntario di curason cu a laga un trayectoria largo di logro, trabou- y esfuersonan cu te dia di awe e bario di Noord ta gosa di nan. Den corto: un ehempel pa sigui.
E premio ta dirigi pa duna reconocimento na baluartenan di e bario di Noord cu den pasado of awo ta/a realisa prestacionnan particular pa y den comunidad. E trabounan realisa mester ta di nivel boluntario y por ta riba diferente tereno contal e meta ta dirigi ariba desaroyo general di e bario di Noord y su habitantenan. Na 2016 sr. Chua Faro a ricibi e Premio Meneer Ovito Tromp y aña pasa srs. Julian Eli Pers (awe d.f.m.) y Isnardo Faro. Personanan cu pa añanan largo a y te ainda ta aporta grandemente na nan dushi Districto di Noord.
Si ta desea di nomina un persona pa Premio Meneer Ovito Tromp por pasa laga un carta acompaña pa e cv di e persona en cuestion. Por haci esaki te dia 9 di maart 2018. Mester entrega e nominacion den un envelop cera dirigi na Comision Premio meneer Ovito Tromp na Chikitin Bin Bin na CBN durante ora di trabou entre 7:30 am y 2:00pm of di diamars pa diabierna di 6:30 pm te cu 10:30 pm na Centro di Bario Noord mes serco nos beheerder sr. Pedro Henriquez.
Directiva di CBN a apunta un comision cu independientemente ta bay evalua tur sugerencia ricibi y a base di criterianan stipula lo scoge e persona/grupo cu lo ricibi e Premio meneer Ovito Tromp 2018.
Di awor caba Directiva di CBN ta invita pueblo henter pa pasa celebra Dia di Himno y Bandera cerca nos na CBN.

Comments

comments

C: Heineken
new india
dvg