Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua riba veld di Dragon Hitters na Barcadera. Den categoria di A-Klas tabata tin 2 wega. E ekipo di Blackhawks ta reacciona viniendo di patras pa derota e ekipo nobo Predators cu score di 15-14. Blackhawks 15 careda, 14 hit, 2 eror. Predators 11 careda, 14 hit, 3 eror. Clay Shipley ta bay completo pa seya e victoria mientras Victor Figuero ta bay cas cu e derota riba su nomber. Miho bateadonan pa Blackhawks tabata ta Edgar Rafael 4-3 incluyendo un homerun, Rodymar Geerman y Clay Shipley ambos di 3-2. Pa e ekipo di Predators a destaca na bate den causa perdi Victor Figuero y Nigel St Jago ambos di 3-3, Josiel Jacobs 3-2, Antonio Ras y Juan Soza di 4-2. Den e di dos wega di A-Klas di anochi Celebrities y Black Joker a bay profundo cu maraton di careda. Celebrities finalmente ta sali victorioso cu 26 careda, 19 hit, 4 eror. Black Joker 20 careda, 9 hit, 5 eror. Albert Croes ta cubri henter e ruta pa pone e victoria riba su nomber. Emon Webb ta resulta pitcher perdedor. Miho bateadonan pa Celebrities ta Albert Croes yudando su propio causa di 5-4, Gregorie Manuel 6-4, Jose Baez y Jose Grigorio Quandt di 4-3, Danilo Croes di 4-2. Pa Black Joker a luci cu e madera den man Giovany Maduro y Lorenzo Maduro di 3-2, Oslin Bergrok di 4-2. Henter e siman aki riba veld di dragon Hitters lo bay tin weganan internacional Champ of the Champs cual lo culmina diasabra awor cu Party Band cerando diadomingo 2 di Juli cu Tsunami. Diamars anochi Policia de Panama lo mira accion. Fanaticada di softball, wak pa bo tey.