Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a continua riba veld di Pos Chiquito. Diasabra ultimo tabata tin 2 wega di A-Klas unda den e promer wega e equipo di Celebrities a sa di saca un victoria importante riba e muchanan di Predators, Angelo Statie kende a inicia e wega riba montículo pa Celebreties a bay e ruta completo pa seya e victoria riba su nomber. Di otro banda Franei Leest tambe a bay completo pa Predators pero ta resulta pitcher perdedor. Celebrities 8 careda, 5 hit, 3 error. Predators 4 careda, 6 hit, 1 error. E mihor bateadornan pa Celebrities ta Howard Croes 3-2, Gregorie Manuela di 3-2 incluyendo un cuadrangular, Jose Baez di 1-1 tambe cu un homerun. Pa Predators a destaca na plato Antonio Ras di 1-1 y Elton Croes di 3-2. Den e di dos wega di anochi e equipo di Logros a knockout Blackhawks y asina ta mantene nan invicto intacto den campeonato di A-Klas den di tercera buelta rumbo pa playoff. Edgar Batista ta cubri henter e ruta lansando un “one hitter” y ta resulta pitcher ganador. Harold de Luvio ta bay cas cu e derota. Logros 12 careda, 10 hit, 0 error. Blackhawks 1 careda, 1 hit, 7 error. Miho bateadonan pa Logros ta Jurrick Cecilia 2-2, Diego Frias 1-1, Milciadis German di 3-2 y e lansador Edgar Batista di 3-1 aportando cu un cuadrangular na su propio causa. Pa Blackhawks a conecta e unico imparable pa su equipo Leonardo Dirksen kende a bay di 2-1. Weganan valido pa campeonato di Aruba Softball Bond ta continua henter siman binidero. Dialuna 17 di Juli AA Pizza Hut Monsters vs Piratas, Diamars 18 Juli Macuarima Indians vs Royal Power, Diaranson 19 Juli Piratas vs Balashi Premium, Diahuebs 20 Juli Spuiters vs Pizza Hut Monsters, Diabierna 21 di Juli Piratas vs Macuarima Indians tur e weganan aki lo ta doublé header riba veld di Dragon Hitters. Tambe Diabierna 21 di Juli Balashi Premuim lo enfrenta Royal Power na veld di Flatstone. Pues campeonato ta den pleno rotacion cu mas di 10 wega den e siman aki. Softball @ “full force”. Jega tereno bin apoya bo equipo preferí.