Corpus Christi ta e fiesta di e Curpa y Sanger di Cristo, di e presencia real di Cristo den Eucaristia. E ta un fiesta cu ta wordo celebra desde siglo XIII. Cu e fiesta aki nos ta conmemora e institucion di e Santa Eucaristia riba Diahuebs Santo y nos ta duna tributo publico y solem di adoracion, amor y gratitud.
E ta un fiesta hopi importante, ya cu Eucaristia ta e regalo di mas grandi cu Dios a duna nos pasobra E tabata desea di keda cu nos, tambe despues di Su Ascencion na shelo.
E aña aki parokia Birgen di Fatima ta celebra e Fiesta di Corpus Christi na un manera special.
Santo Sacrificio di Misa na Misa Birgen di Fatima
Fiesta di Corpus Christi lo ta e aña aki riba diadomingo 18 di Juni 2017. Riba e fecha aki lo celebra un Santo Sacrificio di Misa solem pa 8or di mainta na Centro di Bario y Deporte DAKOTA
Un procesion ta sali for di Centro di Bario DAKOTA y via algun caya di Dakota ta finalisa na Jacintha Kleuterschool Patiastraat 19.
Despues di Santo Sacrificio di Misa lo sali den procesion cu Santisimo cantando canticanan di alabanza y haciendo oracion. Durante e procesion lo bishita 4 diferente altar na unda lo rindi homenahe na Santisimo pa medio di lectura, oracion y canto.
Pastoor Daniel Szpila y comisión CORPUS CHRISTI di Parokia Birgen di Fatima ta invita henter pueblo di Aruba cordialmente pa participa na e Celebracion di Corpus Christi, diadomingo 18 di Juni 2017 pa 8’or di mainta na Centro di Bario y Deporte DAKOTA.