diabetico

Personal di Cas di Aruba y ATA Europa a tene diahuebs mainta 24 di Januari 2013, na vispera di Dia di Betico, un ceremonia pa recorda e fecha di nacemento di Sr. Gilberto Françoise “Betico” Croes, politico y estadista Arubiano. E ceremonia a inicia cu ponemento di un bouquet di flor na e busto di Betico Croes pa Minister Plenipotenciario sr. Edwin Abath, asisti pa directora interino di Cas di Aruba sra. mr. Shandra John. Despues di e acto aki tur presente a pasa pa Sala Betico di Cas di Aruba unda e mandatario a hiba palabra. 

‘Manera tradicion, nos ta hasi un reflexion general como pais, como pueblo, personalmente y como Arubiano, riba e figura transcendental di Betico Croes y e lugar cu e ta ocupa den nos historia, al igual den nos bida diario.’

Minister Plenipotenciario sr. Edwin Abath a sigi bisa den su discurso cu tur aña na vispera di Dia di Betico e ta repasa material fotografico, documento y articulonan dedica na Betico Croes. ‘Un di e potretnan cu sigur a hala mi atencion ta esun di un Betico Croes hoben, na aña 1982 na edad di 44 aña, efectuando apertura di e cede di Representacion di Teritorio Insular di Aruba, aki na Den Haag. Awendia situa den R.J. Schimmelpennincklaan 1 y conoci como Gabinete di Ministro Plenipotenciario di Aruba of popularmente yama Cas di Aruba. E lugar aki pues ta representa e lucha pa autodeterminacion, e ambicion di e Arubiano pa adkiri lo maximo den e relacion den Reino Hulandes. Awe nos por conclui cu Aruba ta goza di gran respet y reconocimento di parti di tur nos partnernan den Reino. 
’No cabe duda cu Betico, mescos cu su antesesor lidernan manera sr. Henny Eman, sr. Juancho Irausquin y Shon A. Eman tabata predestina pa lidera nos pais pa un destino di gran respet. Nos pueblo y su hendenan a wordo guia na un mihor desaroyo personal y na un nivel di bida digno. E mesun candela y e mesun pasion cu semper a biba den curason di e pueblo, cu a wordo cultiva pa Henny, Juancho y Shon A. Eman, a inspira Betico pa lidera un lucha y conduci esaki na realisa e deseo pa ta “baas den nos mes cas”. 

’Betico a hiba un bida di sacrificio y sirbishi, inspira pa e testimonio di lucha cu su antesedornan a laga como herencia. Fiel tabata su amor. E amor di un Arubiano pa su baranca y pueblo. E a consagra su bida den un lucha pa un causa noble y necesario: e balor fundamental cu ta biba profundamente den e alma di e Arubiano pa ta liber den pensamento y accion, pa por determina su propio destino’.
‘Pesey awe nos ta celebra y conhuntamente rindi homenahe na su bida. Laga nos recorde cu un sonrisa y alegria. Y den e mesun sentido aki, laga cada un di nos hasi un reflexion profundo ariba nos proposito personal pa cu nos isla stima.’ asina Minister Plenipotenciario sr. Edwin Abath a bisa.

‘Awe Aruba ta pasando den un di su mihor momentonan, pero sigur e lucha no a termina. E ta continua keto bai. Awe nos ta sinti nos mes orguyoso. Pero orguyo ta manera e flor Dama di anochi, cu ta floria anochi y pashuma su manice. Orguyoso por ta esun cu por mira atras riba e fruta di su trabou. Pesey laga nos no sinta warda y tuma un actitud indiferente. Ban puntra nos mes cada momento, si nos a sirbi Aruba awe y na ki manera, con nos a engrandece Aruba awe. Puntra bo mes kiko mas bo por hasi pa bo pais Aruba y con nos por contribui na e union cu tanto ela desea.’

Minister Plenipotenciario sr. Edwin Abath a termina su discurso bisando: ‘Esaki lo ta e regalo mas grandi pa e gran Arubiano aki. Pa mira con e memoria di su lucha, entrega y sacrificio pa su pueblo ta keda sirbi awe y pa mayan como inspiracion pa tur generacionnan di Arubiano.’

E ceremonia a conclui cu canto di nos himno nacional ‘Aruba Dushi Tera’.