Diadomingo awor, 24 di juni, Centro di Bario Noord (CBN) tin un tremendo actividad pa celebra un di e tradicionnan di mas bieu di nos pais. CBN lo tin un programa cu lo cuminsa 6:00 pm y lo ta yena di musica, baile y competencia. Lo tin presentacion di Ola Tropical y diferente gruponan di baile. Naturalmente lo bay tin tambe e acostumbrado competencia di e baile di bandera, baile di San Juan pa pareha y grito di gay y canto di galiña.
Durante e celebracion bunita aki nos lo tin tambe reconocemento di voluntarionan di curason cu a y ta aporta na desaroyo di nos dushi bario di Noord mediante CBN. Lo reconoce un voluntario den cada area cu CBN ta traha: nos chikitinnan, nos grandinan, nos amanan di cas, domino, baseball y nos programa anual di actividad (Carnaval, Fiesta Arubiano, Aruba Doet, Dera Gay etc). Esaki ta un manera pa CBN gradici cada un di nan na un manera special.
Nos ta spera pueblo en general, specialmente e pueblo di Noord pa bin pasa un dushi anochi cultural yena di musica y baile. Actividad ta start sali 6’or di atardi y lo termina pa 10’or di anochi. Bar y cushina lo ta bon surti.
Pa finalisa nos ta termina cu un mensahe diVicente Ras – Gusta cultura y tradicion di otro, stima y cuida loke ta di nos!! Nos ta warda boso na CBN p’asina engrandece nos celebracion y traspasa un bunita tradicion pa nos hoben y muchanan
.