E celebracion di e 85 aniversario di S.V. Aruba Juniors a continua diahuebs pasa ora cu e seccion di basketball di Aruba Juniors a duna inicio na un torneo di basketball pa su miembro y invitadonan.
Aruba Juniors a opta pa por lo pronto no participa na e campeonato di Aruba Basketball Bond. Esaki door cu ABB a tuma algun decision cu ta contra statuut y e reglamento di cas di e mesun bond. E torneo di Aruba Juniors ta parti den dos grupo unda cu ta hunga tur diahuebs y diabierna anochi. Diahuebs ta hunga e division mini, pasarella y cadet mientras cu diabierna ta hunga un campeonato mixto cu hungadonan di edad di cadet te cu master.
E prome wega di diahuebs tabata den division mini y a bay entre Estrella y Aruba Juniors. Aruba Juniors a sali victorioso cu score di 49-21. Na half-time e wega tabata 25-10 pa esunnan di cas. Top scorer pa Aruba Juniors tabata Simeyon Salomond cu 23 punto y Marcos Gomers cu 12. Simeyon sigur a hala hopi atencion pa su ballhandling, drives y hasta su tironan di tres-punto. Pa Estrella Roland Petrocci a score 12. Estrella tin algun bon dribbler, cu ta priminti hopi, pero nan no tin e habilidad ainda pa penetra y causa daño na e defensa contrario.
E di dos wega a bay entre Yellows y Blues. Den un wega basta pareu Blues a gana 32-26 despues di tabata perdi 17-12 na half-time. Yellow a start efectivo cu bon penetracion. Den di dos mita Blues a tuma e comando over di e wega, hungando mas trankil y sigur mas determina, cu a duna bon resultado. Topscores pa Blues tabata Michael Charles y Jevahno Maduro ambos cu 12 punto. Jenahno tabata fuerte riba e boardnan y a trece hopi trankilidad den e wega. Pa Yellows, Leonardo Winterdal a score 16.
Diabierna e torneo a continua cu dos wega den e liga mixto. Den e prome wega Heat a midi forsa cu Cavallier. Ambos team a hunga un uptempo game cu Rafeek Karmoeddien sacando probecho di su velocidad. Heat ta gana e wega 46-32 cu Rafeek como miho anotador cu 12 punto y Fabio Landa cu 10. Chris Placencio a domina e boardnan cu 17 rebound y 5 asistencia. Pa Cavalliers Leonardo Winterdal a demostra su talento hungando un wega pasivo combina cu atakenan na e renchi. El a anota 20 punto y a tuma 6 rebounds den e causa perdi.
E di dos wega di diabierna a bay entre Celtics y Warriors. Arron Stamper di Celtics a organisa su team di tal forma pa hunga un uptempo game cu a duna Warriors problema pa defende. En cambio Warriors a hunga un wega mas lento, pero hincando e bala pa e postnan. Aki Genaro Helder y Luis Tromp a uza nan veterania pa hunto combina pa 20 punto y 17 rebound. Celtics ta gana e wega cu score di 66-59. Arron Stamper 15, Chris Placensio 13, Starling Arismendy y Eloy Ruiz 12 tabata e miho nan pa Celtics mientras cu pa Warriors Jevahno Maduro y Luis Tromp tabatin 12 punto.
Bo ta invita pa bin presencia algun bon wega di basketball riba e cancha di Aruba Juniors riba diahuebs y diabierna. Entrada ta liber.