E temporada di Carnaval 63 a inicia oficialmente ariba diabierna 11/11/2016.
E dia celebratorio aki a cuminsa na RBC, na unda cu SMAC, hunto cu prensa, Royalties y invitadonan a lansa e jingle oficial di Carnaval 63. Exactamente pa 11’or y 11 minuut y 11 seconde di mainta e jingle a resona den RBC y live via Power FM. E areglo di e jingle ta bao encargo di e talentoso Sr. Rodney v/d Biezen, e composicion di letra y melodia y co-produccion bao encargo di e legendario Janiro Eisden y e jingle a wordo canta pa e popular Mervin “Blacky” Baptiste. Despues di a lansa e jingle, a sigui cu un ceremonia simbolico na unda e jingle a keda “batisa” cu un tremendo bolo di cashupete; 63 cashew a wordo tira riba e CD pa di e manera aki batisa e jingle den un forma masha creativo. Padrino di e jingle ta Sr. Pierre Rafini y madrina di e jingle ta Sra. Carnaval, Candy Maduro.
E jingle di Carnaval ta un proyecto anual di Sr. Ruben “Scorpio” Garcia, patrocina pa RBC Aruba. SMAC ta sumamente contento cu e resultado di e jingle, cu sigur lo haya acogida cerca e pueblo Carnavalesco.
E celebracion no a para eynan. Riba e programa di SMAC pa e dia di 11/11 a anuncia e “Legends Festival”. Legends Festival a tuma luga diabierna anochi na Carnival Village den curason di San Nicolas. For di trempan publico a yega cerca pa disfruta di un programa extenso di entretenimiento y celebracion.
Banda di e meta pa entretene e publico cu e dushi musica carnavalesco, SMAC a tuma e oportunidad pa honra 11 legendario di Carnaval riba e anochi aki. Esaki ta algo cu SMAC lo continua di haci den futuro. E 11 personahenan cu a ricibi homenahe ta; Antoni Gario, Coco Rico Dancers, Liberto Maduro, Rodney Westerburger, Michael Douglas, Jubi Naar, Richard ‘Tattoo” Quant, Lienchie Merrywheater, Pedro Winterdaal, Ruben Garcia & Trudy Hassel.
Despues di e apertura, Minister di Husticia, Sr. Arthur Dowers a hiba palabra expresando su bon deseonan pa e temporada di Carnaval 63 y deseando Presidente di SMAC, Sra. Shannon Henriquez y SMAC tur clase di exito.