Oficina Central di Estadistica (CBS) ta organiza den e periodo di Juni pa Augustus 2017 un estudio yama “Social Wellbeing Survey 2017”, esta un encuesta tocante bienestar social.
E meta di e estudio ta pa obtene informacion tocante con personanan na Aruba ta experiencia diferente aspectonan di bida cu tin di haber cu nan bienestar social y cu nan satisfaccion cu bida en general. E topiconan cu lo wordo trata ta entre otro: participacion social, participacion laboral, nivel di educacion, relacion/conexionanan social, siguridad, salud y ambiente social.
Pakico un estudio tocante bienestar social
Na Aruba, como tambe riba nivel internacional, tin gran interes pa midi y alabes mehora e bienestar social di e poblacion. Durante di e ultimo añanan, diferente organisacion internacional ta promove e midicion di bienestar social a base di diferente aspect di bida. Pues no solamente riba nivel di e economia di un pais, pero tambe riba nivel di diferente aspecto di bida diario di esnan cu ta forma parti di e poblacion di un pais. Un encuesta tocante bienestar social ta yuda complementa informacion di e desaroyo economico di un pais.
Grupo di estudio
E estudio lo dirigi su mes riba personanan adulto den diferente hogarnan cu lo wordo escohi arbitrariamente. Den cada hogar participante, lo scohe un persona den e categoria di edad entre 18 – 59 aña y un persona den e categoria di edad di 60 aña of mas grandi. E escogencia aki lo wordo haci arbitrariamente door di un programa pa colecta. E programa aki ta wordo utilisa pa haci e coleccion di dato miho posibel riba un forma digital (pa medio di un tablet). E distincion entre personanan di 18-59 aña y 60 aña of mas lo wordo haci pa haya mas informacion tambe di e bienestar social di nos grandinan, mirando cu e grupo aki ta creciendo cada dia mas.
Encuesta
Pa e encuesta di bienestar social, 1500 adres lo wordo bishita. E adresnan aki ta reparti over di henter Aruba. Encuestador(a)nan lo bishita e adresnan aki durante dianan den siman y tambe durante di weekend pa sigura cu nan ta haya mas personanan na cas cu lo por participa na e encuesta. E encuestador(a)nan di CBS por wordo reconoci mediante di un badge cu nan nomber, portret y e stempel di CBS.
Mester enfatisa cu e informacion obteni lo wordo procesa di un manera completamente anonimo y lo wordo usa unicamente pa genera estadistica agrega. Despues di e investigacion e informacionnan colecta lo ser procesa pa traha publicacionnan estadistico y e resultadonan lo ser presenta na publico en general. Tur encuestador envolvi ta obliga pa ley di tene secreto tur dato confia na nan.
E cooperacion di comunidad ta di gran importancia pa haci e investigacion di e bienestar social un exito. Di antemano nos kier a gradici pa e cooperacion duna na e investigacion aki.
Encuestado
Personanan interesa den fungi como encuestado pa e estudio aki, cu lo tuma lugar entrante 6 di Juni 2017, pa un periodo di 6 siman, por pasa inscribi te cu dia 31 di Mei 2017 na Oficina Central di Estadistica, L.G. Smith Boulevard 160, Sun Plaza Building, piso 3.
Exigencianan:
Minimalmente MAVO diploma
Edad minimo di 18 aña
Por traha cu un Tablet
Preferiblemente cu experiencia di haci encuesta
Mester ta disponibel full time 40 ora pa siman, tambe den weekend
Conocemento di Papiamento, Hulandes, Ingles y Spaño
Transporte propio
Mester sigui algun mainta di instruccion
No tin antecedente hudicial
Mester tin permiso pa traha
Pa mas informacion por tuma contacto libremente cu Oficina Central di Estadistica na telefon 5247433 y puntra pa un miembro di e team di Encuesta di Bienestar Social of via e-mail: [email protected]