Willemstad Curacao: 19 April 2017, kuater aña despues di asesinato di Helmin Wiels, nos ta dilanti un fase nobo. E asesino, Elvis Kuwas, a keda mientrastantu kondená, awor ta toka turno na e middleman: Burney ‘Nini’ Fonseca.
Polis i Ministerio Públiko a hasi tur kos den nan alkanse pa trese e bèrdat dilanti. Na nos opinion tin, a base di e dossier aktual, sufisiente pruebá ku Fonseca a hasí su mes kulpabel na ko-responsabilidat òf provokashon di asesinato, mata òf laga mata Helmin Wiels. Esaki dor di ehekutá un plan adelantá trahá. For di diferente deklarashon di testigu, entre otro di e propio Kuwas, ta sali na kla e ròl di Fonseca. George Jamaloodin i Robbie dos Santos ta ser sospechá di a duna Fonseca en enkargo pa buska un hende pa mata Wiels. Huntu Luigi ‘Pretu’ Florentina el a hür Kuwas pa mata Wiels. Fonseca i Florentina a fungi manera un ‘mákelar pa mata’ i a organisá e asesinato. Florentina a tene kontakto ku e kulpabelnan finalmente, Fonseca ku esnan ku a duna enkargo. Fonseca tabata e hòmber grandi tras di pantaya ku un ròl krusial.
Dor di mata Wiels a ranka un hòmber kerí for di su famia i for di e proseso demokrátiko. Esei tabata e intenshon tambe di Fonseca: kometé un asesinato polítiko. Anto no dor di kometé esaki e mes, pero dor di kobardia laga otro hende hasi e trabou. Kuwas tabata e pistol den man di Fonseca.
No ta Pueblo Soberano so a pèrdè su lider, pero tambe un lider ku tabata ser kargá dor di Korsou. Esun ku kometé e hecho kondenabel aki di likidá un polítiko, meresé di risibí un kastigu largu. Bala (munishon) i violensia nunka no por tuma e lugá di palabra den un demokrasia i un pais di estado di derechi.
Korsou te dia di awe te ainda ta di shòk dor di e asesinato, tambe pa motibu ku no a hiba tur responsabel ainda dilanti mesa bèrdè. Fonseca ta ninga di duna kuenta i rason i ta ninga di duna klaridat den e investigashon. Ku esaki e ta stroba e hustisia ku Wiels, su famia i komunidat meresé di haña. Fonseca a keda kondená mas biaha, tambe despues di e hecho aki. Fonseca nunka no a mustra duele òf duda moral ora el a risibí e enkargo òf repartí e tareanan ku a kondusí na asesinato di Wiels.
Ta p’esei Ministerio Públiko berdaderamente lo a pidi e kastigu máksimo di 30 aña den e kaso aki di Fonseca. Pero konforme lei mester dedusí e kastigu ku el a haña resientemente di 4 aña. P’esei e demanda di OM pa Fonseca ta sali 26 aña kastigu di prisòn.
E investigashon den e kaso aki pa determiná esnan ku a duna enkargo ta kontinuá. Bon investigashon ta un trabou delikado i ta tuma su tempu. Mientrastantu a pidi Venezuela ekstradishon di Jamaloodin, tambe pa su envolvimentu den asesinato di Wiels. Tin ainda sufisiente posibilidat pa akumulá prueba. Tanten ku esaki ta e kaso, no ta stòp e investigashon.