Den transcurso di siman miembronan di directiva di Carubbian Foundation conhuntamente cu Minister di Turismo Mike de Meza a anuncia cu dia 24 di Augustus Carubbian lo lansa su mes completemente refresca.
Ta asina cu e festival Carubbian a pasa dor di algun turbulencia economico cu mester a wordo rectifica y cu awor ta cla pa cuminsa cu un Carubbian fresco y liber di debe, e minster ta conta.
Riba dia 24 di Augustus Carubbian lo lansa su mes no solamente como un festival turistico cu ta entretene nos bishitantenan, pero Carubbian lo hiba mas di cerca e meta di su fundacion mama y di e forma aki carga San Nicolas su herencia cultural.
Loke e fundacion y su partnernan kier logra cu esaki ta pa e bishitante como tambe e local conoce e storianan real di con San Nicolas a wordo funda.
Esaki ta trece cu ne mas cu claro un show completamente diferente cargando e tema di ‘The Rising of San Nicolas’. Tambe manera Minister de Meza a splica e festival lo usa e diferente localidad di San Nicolas y conta e historia den e show.
Pa cuminsa dia 24 di augustus lo cuminsa Carubbian Festival na Oniels Caribbean Kitchen y e bishitante por cana dor di promenade y disfruta di arte y artesania local, na momento yega na e rotonde lo encontra e area VIP y main stage, lo por sigui cana direccion Water Toren ‘Museo Industrial’ y den e caya eynan lo haya e atraccion di mas dushi cu ta e ‘ foodcourt’ ‘ cu lo wordo compaña pa un setting completamente diferente na esun anterior y durante ful e anochi lo tin diferente sorpresanan cu lo tuma lugar cu lo complimenta e expectaculo cu Carubbian a priminti di ta.
Carubian Foundation y ful Comunidad di San Nicolas ta invita Aruba completo pa bin goza y disfruta di un Carubbian Fetsival mas grandi cu nunca antes bisto, diahuebs 24 di Augustus di 6’or di atardi pa 10’or di anochi. Hunto nos por contribui na e bienestar di #SanNicolas