Gabinete Wever- Croes a huramenta su ministernan di su gabinete pa e proximo periodo di gobernacion 2017-2021. Un di e ministernan cu a huramenta tabata Sr. Danguillame Oduber.
E ta splica su pensamentonan ariba e posicion aki.
Pa Sr. Oduber ta un honor pa forma parti di Gabinete Wever- Croes. Pa su persona ta un dia emocionante pa wak su tata presente durante su huramentacion. Ta un dia grandi, yena cu emocion pero satisfecho cu e resultado di eleccion y e ta cla pa e reto nobo. Un cartera no facil. Un cartera cu hopi, hopi reto. Turismo, pero en especial Salubridad Publico cu no ta uno facil. Na momento cu Formado a acerca su persona cu si e ta acepta e cartera aki, el a admiti e reto aki. E ta un persona hoben, cu hopi energia y e kier traha pa bienestar di e pueblo aki.
Den Salubridad Publico, manera cu a hiba campaña, tin hopi aspecto cu por conoce mehoracion y esey e ta tum’e mente habri. Lo mester haci un inventarisacion, kico ta e situacion cu nan lo hereda. Unda tin espacio pa mehoracion, kico ta e cosnan cu mester cambia. Pa nan ta importante, cu pa e proximo cuater aña, pueblo por mira un cambio den Salubridad Publico, cu nan a mira un cambio den e lista di espera. Ta cosnan chikito pero cu por haci un cambio cerca e pashent cu ta paga pe. E ta un retonan grandi pero e lo busca hendenan cu experiencia pa guia su persona den e proceso. Sigur e ta un reto grandi, nan ta cla pa traha, nan ta lora manga di camisa y cuminsa. Nan ta bay demostra pueblo cu nan ta e diferencia cu nan a vota pe.
Mas aleu, Sr. Oduber a sigui bisa cu e tres carteranan cu el a haya, ta cu por combina e tres carteranan hopi bon. Por combina Turismo cu Deporte, por combina Salubridad Publico cu Deporte. Inculca un mente saludabel, un bida saludabel, come saludabel. Ya esaki tambe ta bay mas den direccion di prevencion y turismo, lo mester hiba un campaña di conscientisacion. Cada un di nos ta embahador di nos pais. Si nos cada un nos, duna di nos parti trece un mehoracion na e manera cu nos ta sirbi otro y trata otro cu respet. Esaki ta manda un señal pa nos huespednan, ya cu semper nos tabata conoci pa ta One Happy Island. Y esey mester wordo inculca bek den e comunidad aki, cu nos ta un pais feliz, un pais contento y un pais servicial, cu na momento cu nos ricibi nos huespednan, cu nan ta sinti nan mes mescos cu ta na cas nan ta.
Lo bin cu campaña di conscientisacion, pa educa e mucha caba, di chikito e importancia di brinda servicio, di ta respetuoso, di un moralidad halto. Esey tambe ta importante, pa stimula e moralidad bek den nos hobennan, segun Sr. Danguillame Oduber, minister di Turismo, Salubridad Publico y Deporte.