Su Excelencia, Dor cu mi ta den exterior, ya cu mi ta de facto persona non grata pa e gobierno actual, mi no por pidi un cita y mi ta tribi di skirbi e carta aki cu e confianza cu den pasado Su Excelencia a duna mi bon conseho ora mi tabata tin mester di guia. Na prome luga mi palabra di felicitacion pa e nombracion y mi deseo di sabiduria pa sa distingui entre bondad y maldad den ehecucion di e funcion di mas halto di nos Pais.
E responsabilidad di gobernador tin di haber cu gobernacion y pa sa kico mester haci tin dos rapport excelente pa duna guia na Su Excelencia. E prome ta e rapport di e Comision di Berdad cu tabata un iniciativa ciudadano respalda pa Gobierno di Aruba y e di dos ta e rapport di WODC riba iniciativa di Gobierno di Reino. E prome ta analisa e gabinetenan di sr. Henny Eman y e di dos ta referi na e gabinetenan di sr. Nelson Oduber, dos personahe menciona den su discurso den Parlamento como lidernan ehemplar kendenan a comete fayonan grandi na nivel di gobernacion. Tur dos rapport ta contene recomendacionnan importante pa mehora e gobernacion di Aruba y pa tal motibo e por spaar Su Excelencia hopi tempo dor di lesa e rapportnan aki pa sa kiko mester haci.
Mi ta recomenda pa Su Excelencia bishita e website di Fundacion Gobernacion di Calidad Aruba, kende a haci un tremendo trabao di pone hunto tur e rapportnan cu por yuda pa combati corupcion na nivel gubernamental. Y despues mi ta recomenda su Excelencia pa pidi un cita cu e directiva di FCGA menciona (srs. Armand Hessels, Leo Maduro, Servito Thijsen) pa scucha nan conseho, ya cu Su Excelencia kier scucha loke ta biba den nos comunidad.
Mi ta gradici Su Excelencia pa su atencion y mi ta desea su famia paz y amor den 2017, mescos cu nos ta desea pa tur famia na Aruba por tin un miho futuro.
Su sirbido,
Rudy Lampe