Cu colaboracion di COSME (Competitiveness Of Small and Medium-sized Enterprises) Camara di Comercio (KvK) a tene un tayer informativo riba e lansamento oficial di Carib Connect. E tayer informativo aki cu a tuma luga diabierna 26 di augustus 2016 den auditorio di KvK. Durante e evento gratis tur e interesadonan cu a registra pa atende, por a bin y conoce un tiki mas over Carib Connect y e beneficionan cu por saca via e plataforma aki. E dia a bai cu bon animo y tambe tabatin oportunidad pa haci pregunta y asina comprende un tiki mas di kico Carib Connect por ofrece.
Carib Connect ta un plataforma cu a wordo diseña pa facilita e proceso di conecta empresarionan cu mentornan, inversionistanan y institutonan financiero pa asina hunto por logra lanta un negoshi cu lo crece y cu por expande su mes den mercadonan internacional. Via Carib Connect por haya informacion y otro documento manera plan di negoshi pa yuda formalisa bo idea. E iniciativa a origina for di e programa di COSME. COSME ta un proyecto funda door di Union Europeo cu tin e meta pa promove y yuda mehora e area comercial di negoshinan mediano y chikito (SMEs) den e teritorionan OCT (Overseas Countries and Territories), na cua entre otro Aruba, Boneiro y Corsou ta pertenece.
Pa e lansamento y pa brinda informacion over Carib Connect a invita sr. Leslie Abell representante di BIDx cu ta e compania cu ta tras e desaroyo di e plataforma di Carib Connect.
Carib Connect ta traha entre otro hunto cu e diferente Camara di Comercio di e region OCT. Carib Connect ta brinda diferente instrumento y recursonan cu ta disponibel pa su miembronan registra. Via BIDx y su otro conexionnan rond mundo, e comunidad di Carib Connect por tin relacionan mas estrecho pafor di e region di Caribe pa por haci negoshi. Pa por haci uso di loke Carib Connect ta ofrece, bo mester bira miembro di Carib Connect y esaki ta completamente gratis.
Ademas na e presentacion encuanto Carib Connect tambe a ser duna un presentacion yama “The power of Google”. Esaki a ser duna door di sr. Tim Quinton, experto di Google My Business y Google Plus. Durante e presentacion aki a splica con Google My Business por yuda bo negoshi y dune mas cobertura den e mundo digital.
Bishita e website www.caribconnect.net of tuma contacto cu KvK pa mas informacion.