Ultimo pronostico pa loke ta e cantidad di vuelo y stoelnan for di Merca pa e periodo di winter 2016-2017 ta conoci y e ta hopi positivo, mustrando un crecemento di 4 porciento.
Minister Otmar Oduber a duna di conoce cu el a haya e cifranan y nan ta sumamente positivo unda cu lo conoce vuelonan extra y avionnan mas grandi pa e periodo di winter cu ta cuminsando dentro di un paar di luna.
E desaroyo positivo aki ta demostra un biaha mas e confiansa cu aerolineanan tin den e mercado di Aruba y tambe e trabounan grandi cu ta wordo haci door di nos diferente partnernan pa atrae mas vuelo y cantidad di stulnan.
E mandatario a indica cu den e periodo aki lo conoce un aumento di 4 porciento cu ta representa 16,800 stoel adicional cu ta wordo logra danki na e siguiente cambionan:
American Airlines lo reanuda su di tres vuelo diario Aruba-Miami entrante 15 di December 2016. E vuelo adicional aki no ta solamente dirigi pa e region di Miami, pero ta mas tanto pa mercadonan secundario, por ehempel conectando e region west cu Aruba.
Tambe Minister Oduber ta menciona cu JetBlue lo adiciona dos vuelo diario for di Boston y New York (JFK). Cuminsando for di 31 di October proximo te cu 1 di April 2017 e aerolinea lo ofrece un vuelo adicional riba diasabra for di Boston y lo agrega un servicio adicional riba diahuebs for di New York cuminsando for di dia 4 di Januari te cu 15 di Februari di otro aña. Ambos vuelo lo wordo realisa cu e avionnan di mas nobo di JetBlue, e A321 Premium Mint experience.
Delta Air Lines tambe ta contribui na e crecemento di 4 porciento adicionando 140 stoel semanal adicional den e ruta di Atlanta-Aruba. Nan lo cambia e avionnan B737-900 pa e B767-400. E avionnan mas grandi aki lo opera entre December 17, 2016 y Maart 25, 2017, aumentando asina e portfolio di Delta pa Aruba cu un 12 porciento en general.
Finalmente, United Airlines a haci diferente ahustacionnan den network adicionando un significante 12% den su capacidad for di Newark, cual ta un combinacion di servicionan semanal adicional y avionnan mas grandi durante e dianan mas druk.
Minister Oduber a bisa cu esaki ta e prome parti di e anuncionan positivo pa loke ta turismo di nos isla, pasobra otro siman lo bin cu mas cu lo ta na beneficio di industria turistico di Aruba.
Na final el a gradici y felicita AAA, ATA y Ministerio di Turismo pa e gran esfuersonan haci durante mas cu un aña pa logra e resultadonan aki for di e Mercado Mericano.