Salud bucodental, necesario pa gosa di un bon calidad di bida, por wordo defini como ausencia di dolor orofacial, cancer di boca of di garganta, infeccion y ulceranan bucal, enfermedadnan periodontal (di encia) caries, perdida di djente y otro patologianan cu ta limita den e persona afecta e capacidad di morde, kauw, hari y papia, na e tempo cu ta repercuta den su bienestar psicosocial.
E Organisacion Mundial di Salud (OMS) ta splica cu e incidencia di cancer di boca ta varia den mayoria di e paisnan entre 1 y 10 caso a cada 100 mil habitante; su prevalencia ta relativamente mayor den hende homber, personanan mayor y e poblacion di nivel educativo abao y di escaso ingreso.
Di acuerdo cu dokter Hector Sanchez, odontologo, specialista den ortodoncia, no ta posibel preveni tur e casonan di cancer di cavidad oral y di orofaringe, pero e riesgo ta por reduci significantemente na evita cierto factornan, manera consumo di tabaco y bebidanan alcoholico.
E personan cu ta stop di consumi tabaco, ainda despues di hopi aña di uzo, ta reduci significantemente e posibilidad di contrae cancer bucal y otro afeccionnan, el a agrega. No obstante, e Sociedad Americana di Cancer ta afirma cu pa algun cancer di cavidad oral y orofaringeo, no tin un causa cla, debi cu algun di esakinan por ta asocia cu otro factor di riesgo cu ainda ta desconoci.
E bon salud bucodental ta repercuta no solamente den e aspecto estetico, tambe na e bienestar general di e persona, debi cu e ta facilita un miho kaumento di alimento y por lo tanto, un eficas probechamento di e nutrientenan pa e organismo, entre otro funcionnan importante.
Di e mesun manera, Sanchez a señala cu e prevencion primario ta consisti den elimina factornan di riesgo cu por produci e enfermedad y establece e habitonan saludabel manera:
• Evita e consumo di tabaco y bebidanan alcoholico.
• Limita exposicion na luz ultravioleta (UV)
• Evita e fuentenan di iritacion bucal (manera djente falso cu no ta debidamente adapta.
• Mantene alimentacion balansa, procurrando un consumo halto di fruta y berdura.
• Practica di un bon higiena bucal.
• Bishita e dentista cu regularidad.
Fuente: http://www.eluniversal.com/