A haci publico riba Prome Minister di Aruba su facebook cu a tuma nota cu e la haci denuncia riba un caso di menasa door di un señora a traves di Canal 90 cu e kier “pasa un bala den mi celebro”.
Ta e prome biaha cu un menasa asina serio ta wordo lansa desde e periodo di gobernacion aki. Hopi ta puntra si mi a acepta esey sin mas. Wel, mi por bisa cu mi a entrega keho contra e señora y e caso ta den man di Ministerio Publico.
Pero mas importante ta cu banda di esey minister encarga cu comunicacion a tuma paso legal contra e emisora cu di su banda no a haci suficiente pa tene control riba su programa. Legalmente a impone e sancion di saca e programa “Pueblo na Palabra” for di aire pa dos dia entrante dialuna awor.
Si algo asina bolbe pasa nan por perde nan licencia. Gabinete Wever-Croes ta tuma e tipo di menasa y violacion di clausula di e permiso di radio hopi na serio y lo no tolera esaki.
Libertad di expresion ta un derecho sagrado cu tur gobierno mester respeta, pero na e derecho aki tin limite na momento cu ta menasa hende cu morto. Orden y respet mester bin bek den nos pais.